काठमाडौं । टेलिग्राम बन्द गर्ने नेपाल सरकारको निर्णयलाई रुसी दूतावासले अवज्ञा गरेको छ । अनलाइन ठगी, मनी लाउन्डरिङजस्ता गम्भीर आपराधिक गतिविधिमा टेलिग्रामको प्रयोग बढेको भन्दै हालैनेपाल सरकारले टेलिग्राम बन्द गर्ने निर्णय गरेको थियो। ।
यद्यपि, रुसी दूतावासले गत शनिबार आफ्नो सामाजिक सञ्जाल फेसबुकमार्फत टेलिग्राममा सूचना प्रसारण निरन्तर जारी राख्ने जनाएको छ ।
दूतावासले आफ्नो आधिकारिक टेलिग्राम च्यानल सञ्चालनमा रहेको जानकारी दिँदै, नेपाल टेलिकम्युनिकेशन्स अथोरिटीको निर्णयअनुसार देशभित्र टेलिग्रामलाई अवरुद्ध गरिएकोले च्यानलमा पहुँचमा असुविधा भने हुन सक्ने जनाएको छ ।
जसका कारण दूतावासले स्थिर सञ्चार कायम राख्न र सूचना प्रदान गर्न आफ्नो वेबसाइट र अन्य सामाजिक सञ्जाल प्लेटफर्महरू (भीके, फेसबुक र इन्स्टाग्राम) जस्ता वैकल्पिक माध्यमहरू पनि प्रयोग गरिरहेको दुतावासद्वारा जारी सूचनामा उल्लेख छ ।
यस्तै नेपाल सरकारले अनलाइन सुरक्षासम्बन्धी चिन्ताहरूका कारण विगतमा टिकटकलाई पनि अवरुद्ध गरेको स्मरण गराउँदै, रुसी दूतावासले यस विषयमा सबैको समझदारीप्रति आभार व्यक्त समेत गरेको छ ।
Comments 1