काठमाडौँ — भारतको अग्रणी सूचना प्रविधि कम्पनी टाटा कन्सल्टेन्सी सर्भिसेस (TCS) ले आगामी वर्ष २०२६ मा १२ हजारभन्दा बढी कर्मचारी हटाउने तयारी गरेको छ। कम्पनीले आफ्नो कुल कर्मचारी संख्याको करिब २ प्रतिशत कटौती गर्न लागेको हो।
कम्पनीले यो कदम चाल्नुको प्रमुख कारणको रूपमा “सीप अभाव” (skill mismatch) रहेको जनाएको छ। कम्पनीका अनुसार, एआईको प्रयोगसँगै व्यवसायिक मोडलमा महत्वपूर्ण परिवर्तन आएको छ । यसका कारण धेरैजसो मध्य तथा माथिल्लो तहका कर्मचारीहरूको कार्यक्षमता नयाँ आवश्यकताअनुसार परिमार्जन गर्न गाह्रो भइरहेको छ।
नयाँ युगको तयारीमा पुनः तालिम
TCS ले हालसम्म ५ लाख ५० हजारभन्दा बढी कर्मचारीलाई आधारभूत एआई सीपहरूमा तालिम दिइसकेको छ भने करिब १ लाख जनशक्तिलाई उन्नत एआई सीपहरूमा प्रशिक्षित गरिसकेको छ। यद्यपि, कम्पनीले प्रभावकारी रूपमा कर्मचारीलाई पुनः नियुक्त (redeploy) गर्न नसकेको स्वीकार गरेको छ र तालिमकै क्रममा करिब १२,२०० रोजगारी कटौती हुने कम्पनीले जनाएको छ।
AI का कारण मात्र होइन : TCS सीईओ
TCS का प्रमुख कार्यकारी अधिकृत के. कृथिवासनका अनुसार यो निर्णय “एआई को कारण मात्र” नभई कम्पनीको दीर्घकालीन रणनीति अनुसार पनि गरिएको हो। उनी भन्छन्, “AI को प्रयोग त विकासको पाटो हो, तर हामी मुख्यत हाम्रो जनशक्तिलाई आगामी व्यवसायिक आवश्यकता अनुसार तयारी गराउँदैछौँ।”
कम्पनीको समर्थन र व्यवस्थापन
कम्पनीले लेअफमा प्रभावित कर्मचारीहरूलाई सेवा विच्छेद सुविधा (severance package), स्वास्थ्य बीमा, मानसिक स्वास्थ्य परामर्श, तथा वैकल्पिक रोजगारी खोज्न सहयोग गर्ने बताएको छ।
आर्थिक दबाब र प्रतिस्पर्धात्मक बजार
सूचना प्रविधि बजारमा हाल ग्राहकहरूबाट मूल्य कटौतीको माग बढिरहेको, सेवा लागत बढ्दो अवस्थामा रहेको र परम्परागत सेवाहरूको माग घट्दै गएको सन्दर्भमा TCS ले यो निर्णय लिएको बताइएको छ।
TCS ले यो कदमलाई “भविष्य-केन्द्रित संस्था” निर्माणको दिशामा लैजान उठाइएको रणनीतिक परिवर्तनको रूपमा व्याख्या गरेको छ। कम्पनीले AI र डिजिटल प्रविधिमा अघि बढ्ने क्रममा कर्मचारीलाई पनि प्रभाव पार्ने रणनीति लिनुपरेको बताएको छ।
