काठमाडौं। भारतले अमेरिकामा स्मार्टफोन निर्यात गर्ने मुख्य देशको रूपमा चीनलाई पछि पारेको छ। सन् २०२५ को दोस्रो त्रैमासिकमा अमेरिकाले आयात गरेका स्मार्टफोनमध्ये करिब ४४ प्रतिशत भारतबाट निर्यात भएका छन्। यो अघिल्लो वर्षको तुलनामा झण्डै २४० प्रतिशतले बढी रहेको छ।यसको प्रमुख कारण एप्पल कम्पनीले चीनमा निर्भरता घटाउँदै भारतमा आइफोन उत्पादन बढाउनु हो। ‘चाइना प्लस वान’ रणनीति अनुसार एप्पलले भारतलाई वैकल्पिक उत्पादन केन्द्रको रूपमा विकास गरिरहेको छ।
भारत सरकारका अनुदान कार्यक्रम, श्रम लागतको प्रतिस्पर्धी दर र उत्पादनका लागि सहज वातावरणले गर्दा एप्पललगायतका कम्पनीहरू भारततर्फ आकर्षित भएका हुन्। हाल अमेरिकामा बिक्री हुने धेरै आइफोनहरू भारतमै निर्माण भएका छन्।
यद्यपि, अमेरिकाका राष्ट्रपति डोनाल्ड ट्रम्पले भारतबाट हुने आयातमा २५ प्रतिशत भन्सार शुल्क लगाउने घोषणा गरेका छन्, जसले आगामी दिनमा व्यापारमा प्रभाव पार्न सक्ने देखिन्छ। तर हालसम्म स्मार्टफोन तथा इलेक्ट्रोनिक उत्पादनहरू ती शुल्कबाट मुक्त छन्।
विश्लेषकहरूका अनुसार एप्पलले भारतमा दीर्घकालीन उत्पादन रणनीति अघि बढाउने संकेत दिइसकेको छ, र शुल्क लागे पनि त्यसले तत्काल ठूलो असर नपार्ने आँकलन गरिएको छ।
