काठमाडौं । चिनियाँ अडियो प्रविधि कम्पनी iKKO Audio ले स्मार्टफोनको क्षेत्रमा प्रवेश गर्दै ‘Mind One Pro’ नामक नयाँ AI Powered फोन सार्वजनिक गरेको छ। स्मार्टफोनबिनै एआई सुविधा प्रयोग गर्न सकिने, सिम कार्ड नचाहिने, र विश्वभर स्वतः इन्टरनेट जडान हुने विशेषता यो फोनमा रहेको छ।
Yanko Design र Liliputing का अनुसार, ‘Mind One Pro’ आकारमा कार्डजस्तै सानो छ र यसमा ४.०२ इन्चको वर्गाकार AMOLED स्क्रिन दिइएको छ। झोलामा सजिलै अटाउने यो फोन एआई-फोकस विशेषताका साथ आउँदैछ, जुन Android 15 मा आधारित iKKO AI OS प्रणालीमा चल्नेछ।
यस फोनले ChatGPT, NotebookLM जस्ता सेवाहरूलाई सिधा प्रणालीमा इन्टिग्रेट गरेको छ। यसले नोटको सारांश बनाउने, सन्देशलाई आवाजमा रूपान्तरण गर्ने, वास्तविक समय अनुवाद गर्ने, आवश्यक सूचना मात्र देखाउने ‘Focus Mode’ जस्ता सुविधा प्रदान गर्छ।
विशेष कुरा के छ भने, यसमा vSIM (भर्चुअल सिम) प्रयोग गरिएको छ, जसले ६० भन्दा बढी देशमा स्वतः नेटवर्क जडान गरी प्रयोगकर्तालाई निशुल्क इन्टरनेट सुविधा दिन्छ। यसको अर्थ, प्रयोगकर्ताले सिम कार्ड वा Wi-Fi प्रयोग नगरीकन पनि इन्टरनेट चलाउन सक्छन्।
फोनमा ४G+ नेटवर्क सपोर्ट छ, जुन विश्वभर स्थिर रूपमा काम गर्ने, र ब्याट्री बचत गर्ने उद्देश्यले अपनाइएको बताइएको छ। ८ GB RAM, २५६ GB स्टोरेज र २,२०० mAh ब्याट्री सहित आएको यस फोनले करिब १६ घण्टा लगातार भिडियो प्लेब्याक क्षमता दिन्छ।
फोनमा ५० मेगापिक्सेलको Sony सेन्सर प्रयोग गरिएको छ, जुन घुम्ने क्यामेरा भएकोले अगाडिको सेल्फी र पछाडिको मुख्य क्यामेरा दुबै रूपमा प्रयोग गर्न सकिन्छ। यसमा अप्टिकल इमेज स्टेबिलाइजेसन (OIS) समेत उपलब्ध छ।
फोनको आकार ८६×७२×८.९ मिलिमिटर छ र यसको चौडाइ ३.३९ इन्च रहेको छ। प्रयोगकर्ताले चाहेमा, अतिरिक्त केस जोडेर QWERTY किबोर्ड, ३.५ मिमि हेडफोन ज्याक र स्ट्र्याप लूप थप गर्न सक्छन्।
फोनको प्री-अर्डर मूल्य २९९ अमेरिकी डलर (झण्डै ३९ हजार नेपाली रुपैयाँ) तय गरिएको छ भने खुद्रा मूल्य करिब ३६९ डलर (झण्डै ४९ हजार रुपैयाँ) हुन सक्ने Yanko Design को अनुमान छ। यो मूल्यले फोनलाई मध्य-श्रेणीको भन्दा सस्तो तर विशिष्ट सुविधा भएको डिभाइस बनाउने अपेक्षा गरिएको छ।
Mind One Pro को यस्तो डिजाइन र विशेषता विशेषगरी धेरै देश घुम्ने व्यवसायी, यात्रा गर्नेहरू, वा सिम कार्ड फेर्न झन्झट मान्ने प्रयोगकर्ताका लागि उपयोगी हुने आशा गरिएको छ। बजारमा उपलब्ध अरू AI Powered फोनहरूबीच पनि यसको भिन्नता र नविन प्रयोगले यो फोन नेपालीहरूका लागि समेत चासोको विषय बनेको छ।
