काठमाडौं । कलंकीमा क्रिप्टो करेन्सी (Crypto currency) को अवैध कारोबार गरेको आरोपमा एकजनालाई प्रहरीले पक्राउ गरेको छ।
मिति २०८२।०४।१७ गते काठमाडौं महानगरपालिका वडा नं. १४ कलंकीमा आएको अभौतिक मुद्रा (Crypto currency) को अवैध कारोबार गरिरहेको सूचनाको आधारमा प्रहरीले कारबाही गरेको हो।
पक्राउ पर्नेमा मकवानपुर जिल्ला हेटौंडा उपमहानगरपालिका वडा नं. १६ चिसापानी स्थायी घर भई हाल भक्तपुर जिल्ला मध्यपुर ठिमी नगरपालिका वडा नं. ०३ कौशलटार बस्ने २९ वर्षीय सुशान्त दाहाल रहेका छन्।
प्रहरीको अनुसन्धानमा दाहालले नेपाली रुपैयाँ ७८ लाख ३० हजार ३८८ रुपैयाँ भन्दा बढी रकमको क्रिप्टो करेन्सी कारोबार गरेको खुलेको छ। उनले USDT, BTC, ETH र BNB जस्ता अभौतिक मुद्राको प्रयोग गरेको प्रहरीले जनाएको छ।
यस घटनामा प्रहरी उपरीक्षक कुलदीप चन्दको नेतृत्वमा कारबाही भएको र थप अनुसन्धान जारी रहेको जिल्ला प्रहरी कार्यालय काठमाडौंले जनाएको छ।
