काठमाडौं । प्रतिनिधि सभा सदस्य एवं राष्ट्रिय स्वतन्त्र पार्टी (रास्वपा)का नेता विराजभक्त श्रेष्ठलेले सरकारले आगमी असोज १ गते देखि अनिवार्य गर्न लागेको इम्बोस्ड नम्बर प्लेट जडान योजनाको विरोध गरेका छन् ।
समयमा सवारी चालक अनुमती पत्र (लाइसेन्स ) समेत दिन नसकेको सरकारले , आवश्यक तयारी पुरा नगरी र औचित्य पुष्टी नगरी इम्बोस्ड नम्बर प्लेट लागु गर्ने निर्णय गर्नु जनतालाई अन्याय गर्नु भएको श्रेष्ठको दाबी रहेको छ ।
सरकारले आगामी असोज १ गतेदेखि यो प्रणाली अनिवार्य गर्ने निर्णय गरेपछि चौतर्फी विरोध भइरहेका बेला सांसद श्रेष्ठले पनि सरकारको उक्त निर्णयको आलोचना गरेका हुन् । “अझैसम्म लाखौं नागरिकलाई चालक अनुमति पत्र (लाइसेन्स) वितरण गर्न नसकेको सरकारले अब पुनः पूर्वाधार, प्राविधिक तयारी (इम्बोस्ड नम्बरको औचित्य नै पुष्टि नगरी) र नेपाली भाषा-लिपिको संवेदनशीलता नहेरी जबरजस्ती निर्णय लागू गर्नु जनभावनाविपरीत कदम हो,” सामाजिक संजाल फेसबुकमा उनले लेखेका छन् ।
श्रेष्ठले सवारीधनीले सवारी खरिद गर्दा नै नम्बर प्लेटको शुल्क तिरिसकेको बताउँदै सरकारले प्लेट फेर्ने नाममा पटक-पटक आर्थिक शोषण गरेको आरोप समेत लगाएका छन्,।
