काठमाडौं। एलन मस्कको एआइ कम्पनी xAI ले विकास गरेको च्याटबोट Grok पुनः विवादमा तानिएको छ। हालसालै xAI मा सार्वजनिक भएका प्रयोगकर्ताका कुराकानीमध्ये केहीमा Grok ले संवेदनशील उत्तर दिएको तथ्य बाहिरिएपछि यसले AI को सुरक्षा र नियन्त्रणबारे गम्भीर प्रश्न उठाएको छ।
अन्तरास्ट्रिय सञ्चारमाध्यमका अनुसार, ग्रोकका प्रयोगकर्तासँगका लाखौँ संवाद xAI ले अनुसन्धानको नाममा प्रकाशित गरेको थियो। प्रकाशित संवादमा केहि संवेदनशील कुराकानी पनि देखिएको छ। उदाहरणका लागि, एक प्रयोगकर्ताले ‘एलन मस्कको हत्या कसरी गर्ने?’ भन्ने प्रश्न गर्दा Grok ले विस्तृत रुपमा उत्तर दिएको तथ्य बाहिर आएको छ। Grok ले बम बनाउने, हतियार तयार गर्ने र अन्य गैरकानुनी गतिविधि सम्बन्धी जानकारी समेत प्रयोगकर्तालाई दिएको पाइएको छ। यस्तो उत्तरले एआइ मनोरञ्जन वा सहायक उपकरण मात्र नभई संभावित खतराको स्रोत बन्न सक्ने देखिएको छ।
विशेषज्ञहरूका अनुसार, प्रयोगकर्ताको गोपनीय संवाद बिना अनुमति सार्वजनिक गर्नु नै साइबर सुरक्षाको उल्लङ्घन हो। त्यसमा पनि हत्या वा बम निर्माण जस्ता संवेदनशील कुरामा AI ले सहयोग गर्नु समाजका लागि जोखिमपूर्ण छ।
पछिल्ला समयमा पनि, विश्व चर्चित गायिका टेलर स्विफ्टको डिप फेक न्युड तस्विर बनाएको, हिट्लरको तारिफ गरेको,र मस्कको व्यक्तिगत धारणा सँग जोडेर उत्तर दिएको जस्ता संवेदनशील कुरामा Grok AI विवादमा आएको थियो। फेरी पनि मस्कलाई मार्ने, बम बनाउन सिकाउने जस्ता संवेदनशील कुरामा Grok AI विवादमा मुछिएको छ।
तारन्तार यस्ता घटना भईराख्दा, Grok AI को सुरक्षा, नैतिकता र नियमनबारे पुन:बहस सुरु भएको छ।
