काठमाडौं । प्रधानमन्त्री खड्ग प्रसाद ओली उर्फ केपी ओलीले फेसबुक पोस्ट मार्फत आइटी क्षेत्रमा काम गर्ने दक्ष जनशक्तीलाई दुई लाख सम्म तलब दिइने जानकारी गराएका छन्, । सरकारको यस कदमले ओलीले सरकारी सेवा विस्तार गर्दा काममा ढिलासुस्ती गर्ने, घुस र कमिसन लिने प्रवृत्ति नियन्त्रण हुने र सूचना प्रविधिको दक्ष जनशक्ति विदेश पलायन हुनबाट रोकिने दाबी समेत गरेका छन्।
हालै मात्र सञ्चार तथा सूचना प्रविधि मन्त्रालयले आफू सम्बद्ध निकायका लागि सफ्टवेयर बनाउने र परामर्श दिने सूचना प्रविधि जनशक्तिको न्यूनतम मासिक पारिश्रमिक, शैक्षिक योग्यता र अनुभवको मापदण्ड निर्धारण गरेको थियो । सोही निर्णयलाई आधार बनाई केपी ओलीले उक्त पोस्ट गरेका हुन्, । मन्त्रालयले सार्वजनिक खरिद नियमावली, २०६४ को नियम १२ अनुसार प्राप्त अधिकार प्रयोग गरी ‘सूचना प्रविधि प्रणालीको विकास तथा परामर्श सेवाको लागत अनुमानसम्बन्धी नर्म्स्, २०७२’ लागु गर्दै यो नयाँ व्यवस्था गरेको हो । उक्त व्यवस्था अनुसार टिम लिडर वा प्रोजेक्ट म्यानेजरले दुई लाख सम्म तलब पाउने उल्लेख रहेको छ भने यसका लागि सूचना प्रविधिमा स्नातकोत्तर गरी पाँच वर्षको अनुभव हासिल गरेको हुनुपर्छ ।
यस्तै साइबर सुरक्षा क्षेत्रमा काम गर्ने ‘एसओसी एनालिस्ट (एल ३)’, ‘डिजिटल फरेन्सिक्स एनालिस्ट’ र ‘थ्रेट इन्टेलिजेन्स विशेषज्ञ’ जस्ता पदका लागि स्नातक तह र सम्बन्धित विषयमा अन्तर्राष्ट्रिय प्रमाणीकरण (सर्टिफिकेसन) सहित पाँच वर्षको अनुभव चाहिनेछ । उनीहरूको मासिक पारिश्रमिक एक लाख ७२ हजार रुपैयाँ निर्धारण गरिएको छ ।
अन्य पदको लागि कति तलब के योग्यता:
सिस्टम आर्किटेक्ट/एनालिस्ट: स्नातक तह, पाँच वर्ष अनुभव, मासिक पारिश्रमिक एक लाख ६० हजार रुपैयाँ ।
सिनियर सफ्टवेयर/वेब/आईओएस/एन्ड्रोइड डेभलपर र सिनियर डेटाबेस डिजाइनर: स्नातक तह, पाँच वर्ष अनुभव, मासिक पारिश्रमिक एक लाख ४० हजार रुपैयाँ ।
क्लाउड र पूर्वाधार विज्ञ तथा एपीआई डेभलपर: स्नातक तह, क्रमशः पाँच र तीन वर्ष अनुभव, मासिक पारिश्रमिक एक लाख २५ हजार रुपैयाँ ।
इथिकल ह्याकर र एप्लिकेसन सेक्युरिटी इन्जिनियर: स्नातक तह, २ वर्ष अनुभव, मासिक पारिश्रमिक एक लाख १० हजार रुपैयाँ ।
इ सेक्युरिटी अफिसर: स्नातक तह, तीन वर्ष अनुभव, मासिक पारिश्रमिक एक लाख पाँच हजार रुपैयाँ ।
डेटाबेस एड्मिनिस्ट्रेटर, सफ्टवेयर टेस्टर र आईटी अडिटर: स्नातक तह, तीन वर्ष अनुभव, मासिक पारिश्रमिक ९० हजार रुपैयाँ ।
सफ्टवेयर/वेब डेभलपर/डिजाइनर: स्नातक तह, दुई वर्ष अनुभव, मासिक पारिश्रमिक ८० हजार रुपैयाँ ।
सेक्युरिटी अपरेसन्स सेन्टर (एसओसी) एनालिस्ट (एल १): स्नातक तह, एक वर्ष अनुभव, मासिक पारिश्रमिक ६५ हजार रुपैयाँ ।
