काठमाडौं। मंगल ग्रहसम्म मानव पठाउने दीर्घकालीन योजनाको आधारस्तम्भ मानिने विशाल Starship रकेटको १०औं परीक्षण उडान सफलतापूर्वक सम्पन्न भएको छ। SpaceX ले यस उडानलाई “सबै प्रमुख लक्ष्यहरू पूरा भएको” भन्दै ऐतिहासिक उपलब्धि मानेको छ।
विश्वकै सबैभन्दा विशाल र शक्तिशाली मानिने यस रकेट नेपाली समय अनुसार, गत बुधबार बिहान ६: १५ मा टेक्ससबाट उडान भरेको थियो। अन्तरास्ट्रिय मिडियाका अनुसार, Starship को यो उडानमा रकेटको पुनःप्रवेश र सुरक्षित अवतरणसम्मका सबै महत्त्वपूर्ण चरण सफल भएका थिए।
यसअघि भएका परीक्षण उडानहरू असफल भएका घटनाहरू र सुरुमा तय गरिएको दशौं फ्लाइट पनि स्थगित भएका कारण Starship रकेटको सफल उडानप्रति आशा कम भएको थियो। तर, यसपटक इन्जिन प्रदर्शन, उचाइमा स्थायित्व, र अवतरण क्रममा नियन्त्रण, जस्ता सबै महत्त्वपूर्ण पक्षमा कम्पनीले अपेक्षित नतिजा हासिल गर्दै प्रक्षेपण सफल भएको छ।
यस उडानको सफलतालाई NASA को Artemis III मिशनका लागि महत्वपूर्ण मानिएको छ। अन्तर्राष्ट्रिय मिडियाका अनुसार, NASA ले Starship रकेटको प्रयोग गर्दै २०२७ मा मानिसलाई चन्द्रमामा पठाउने योजना बनाएको छ।
Starship एक सामान्य रकेट मात्र नभएर, एलन मस्कको ड्रिम प्रोजेक्ट समेत रहेको छ। उनले यस Starship रकेट लाई मानव सभ्यता बहुग्रहीय बनाउने सपना साकार गर्ने प्रमुख माध्यमका रूपमा प्रस्तुत गर्दै आएका छन्। उनको मुख्य लक्ष्य मंगल ग्रहमा मानव बस्ती बसाउने रहेको पनि उनले बताउदै आएका छन् । Starship रकेटको यो सफल प्रक्षेपणले एलन मस्कको सपना सफल बनाउन ठूलो कदम अघि बढाएको मानिन्छ। यस उपलब्धिले अन्तरिक्ष यात्राको भविष्य उज्ज्वल हुने आशा पनि देखाएको छ।
