काठमाडौं। प्रतिस्पर्धी कम्पनी ओप्पोलाई आफ्नो व्यापारिक गोप्य जानकारी (ट्रेड सिक्रेट्स) साझा गरेको आरोपमा एप्पलले आफ्ना पूर्व कर्मचारी चेन् शी र चिनियाँ कम्पनी ओप्पोविरुद्ध अमेरिकाको अदालतमा मुद्दा दायर गरेको छ।
एप्पलका अनुसार, जनवरी २०२० देखि जून २०२५ सम्म सेन्सर सिस्टम आर्किटेक्टका रूपमा काम गरेका शी ले कम्पनी छोड्नुअघि सहकर्मीहरूसँग वान-ओ-वान बैठक बसेका थिए । ती बैठकबाट उनले स्वास्थ्यसँग सम्बन्धित अप्टिकल, तापक्रम र ईसीजी सेन्सर जस्ता प्रविधि सम्बन्धी संवेदनशील विवरण संकलन गरेका थिए।
उजुरी अनुसार, शी ले जून २०२५ सम्म एप्पलमा काम गरे पनि अप्रिल २०२५ मै ओप्पोमा रोजगारीको खोजी रहेका थिए। उनले ओप्पोमा काम गर्ने जानकारी लुकाएका थिए र आफ्नो वृद्ध आमाबुबाको हेरचाह गर्न चीन फर्किने तर नयाँ जागिर खोज्ने कुनै योजना नभएको बताएका थिए ।
उक्त उजुरीमा, शी ले कम्पनीको प्रोटेकटेड फोल्डर्सबाट ६३ गोप्य फाइल डाउनलोड गरी यूएसबी ड्राइभमा स्थानान्तरण गरे र त्यसपछि आफ्ना गतिविधि लुकाउन ‘म्याकबुक कसरी मेटाउने’ जस्ता सर्चसमेत गरेको आरोप लगाइएको छ। यति मात्र नभई उनले ओप्पोका अधिकारीलाई एप्पलको स्वास्थ्य प्रविधिबारे “जति सकिन्छ त्यति जानकारी सङ्कलन गर्ने” आश्वासन दिएको उल्लेख गरिएको छ ।
ओप्पोले भने यस आरोपबारे प्रतिक्रिया दिँदै, एप्पलको ट्रेड सिक्रेट दुरुपयोग नगरेको बताएको छ।
यसअघि पनि Vision Pro सम्बन्धी व्यापारिक गोप्य जानकारी Snap लाई साझा गरेको भन्दै एप्पलले एक डिजाइन इन्जिनियरविरुद्ध मुद्दा दायर गरेको थियो ।
