काठमाडौं। चीनसँग सम्बन्धित ‘साल्ट टाइफुन’ नामक ह्याकिङ समूहले कम्तीमा २०० भन्दा बढी अमेरिकी कम्पनीमा साइबर आक्रमण गरेको पुष्टि गरिएको छ। अमेरिकी संघीय अनुसन्धान ब्युरो (एफबीआई) का सह निर्देशक ब्रेट लेथरम्यानले वाशिङटन पोस्टसँगको अन्तरवार्तामा यो जानकारी दिएका हुन्।लेथरम्यानले ह्याक भएका कम्पनीका नाम भने खुलाएका छैनन्।
अन्तरास्ट्रिय मिडियाका अनुसार, ‘साल्ट टाइफुन’ नामक यस ह्याकिङ समूहले अघिल्लो चरणमा नौ अमेरिकी दूरसञ्चार तथा इन्टरनेट प्रदायक कम्पनीमा ह्याकिङ गरेको थियो। हालसम्म थाहा भएको जानकारी अनुसार, साल्ट टाइफूनले ८० देशका कम्पनीहरूमा आफ्नो साइबर हमला गरेको छ, जसले चिनियाँ जासुसी अभियान विश्वव्यापी स्तरमा पहिलोपटक सार्वजनिक गरेको छ।
यो ह्याकिङ समूहले परम्परागत फिसिङ इमेल मात्र नभई उच्चस्तरीय प्रविधि प्रयोग गरेर सुरक्षा प्रणाली कमजोर बनाउने प्रयास गरेको बताइएको छ। एफबीआईका अधिकारीहरूका अनुसार, प्रभावित कम्पनीहरूको संख्या अझ बढ्न सक्ने सम्भावना छ।
ह्याकरहरूले अमेरिकी उच्च अधिकारी र राजनीतिक नेताहरूका फोन कल रेकर्ड लक्षित गरेका थिए, जसबाट उनीहरूले को सँग को सम्पर्कमा छ भन्ने जानकारी संकलन गर्न पाएको बताइएको छ। खतरा असाध्यै बढेका कारण केही समयका लागि एफबीआईले अमेरिकी नागरिकहरूलाई आफ्नो फोन कल र सन्देश सुरक्षित राख्न एन्क्रिप्टेड मेसेजिङ एप प्रयोग गर्न समेत सल्लाह दिइएको बताइएको छ।
एफबीआईले करिब दुई दर्जन अन्तर्राष्ट्रिय निकायहरूसँग मिलेर बुधबार सार्वजनिक गरेको विवरण अनुसार, ‘साल्ट टाइफुन’ले प्रायः कम्पनीका राउटरहरू लक्षित गर्दै संवेदनशील नेटवर्क ट्राफिक चोर्ने गरेको उल्लेख गरिएको छ। सो रिपोर्टमा, ह्याकिङ कसरी पत्ता लगाउने भन्ने प्राविधिक दिशानिर्देश पनि प्रदान गरिएको छ।
