काठमाडौं। ChatGPT को प्रयोग दिनप्रतिदिन बढ्दै गएको छ। कम्पनीका अनुसार यस हप्ता यसले ७०० मिलियन साप्ताहिक सक्रिय प्रयोगकर्ताको संख्या छुन लागेको छ।
ओपनएआईका उपाध्यक्ष निक टरलीका अनुसार, मार्च महिनाको अन्त्यसम्म एपमा ५०० मिलियन सक्रिय प्रयोगकर्ता थिए। त्यसपछि एपको प्रयोग चार गुणा बढेको छ। उनको अनुसार “हरेक दिन मानिसहरू नयाँ कुरा सिक्दैछन्, नयाँ कुरा सिर्जना गर्दैछन् र चुनौतीपूर्ण समस्या समाधान गर्दैछन्। ChatGPT लाई अझ उपयोगी बनाउँदै सबैलाई एआईको फाइदा पुग्ने गरी हाम्रो लक्ष्यमा काम गरिरहेको टोलीप्रति आभारी छु,” उनले पोस्ट गरेका छन्।
मार्चमा ओपनएआईले जीपीटी–४ मोडेलको सहयोगमा नयाँ तस्बिर बनाउने सुविधा सार्वजनिक गरेपछि एपको लोकप्रियता निकै बढेको बताइएको छ। अप्रिलको शुरुमा कम्पनीका प्रमुख सञ्चालन अधिकृत ब्र्याड लाइटक्यापले भनेका थिए कि सार्वजनिक भएदेखि केही दिनभित्रै १३० मिलियनभन्दा बढी प्रयोगकर्ताले ७०० मिलियनभन्दा बढी तस्बिर बनाइसकेका छन्।
सदस्यता सेवामा पनि वृद्धि भइरहेको छ। लाइटक्यापका अनुसार, अहिले ५ मिलियनभन्दा बढी व्यवसायिक प्रयोगकर्ताले भुक्तानी गरी च्याटजीपीटी प्रयोग गरिरहेका छन्, जुन जून महिनामा ३ मिलियन थियो।
मार्केट अनुसन्धान कम्पनी सेन्सर टावरको रिपोर्ट अनुसार, प्रयोगकर्ताहरूले एक महिनामा औसत १२ दिन भन्दा बढी च्याटजीपीटी प्रयोग गरिरहेका छन्, जुन गुगल र एक्स पछि तेस्रो सबैभन्दा धेरै हो। यस वर्षको पहिलो छ महिनामा प्रयोगकर्ताले दैनिक १६ मिनेट एपमा बिताएका छन्।
