काठमाडौं। चिनियाँ वैज्ञानिकहरूले भवन निर्माण सामग्रीमा ठूलो क्रान्ति ल्याउने सम्भावना बोकेको नयाँ प्रकारको सिमेन्ट विकास गरेका छन्। यो सिमेन्टले सूर्यको प्रकाश सोस्नुको सट्टा त्यसलाई स्क्याटर गर्ने बताइएको छ। यो आविष्कारले तातो मौसममा भवनभित्रको तापक्रम कम गरेर ऊर्जा खपत घटाउन मद्दत गर्ने अपेक्षा गरिएको छ।
अन्तरास्ट्रिय मिडियाका अनुसार, प्रयोगशालामा परीक्षण गर्दा यस सिमेन्टले परम्परागत सिमेन्टको तुलनामा लगभग ५.४°C कम तापक्रम कायम राख्न सक्ने देखिएको छ। यसका लागि सिमेन्टमा विशेष किसिमको नानो-संरचना प्रयोग गरिएको छ, जसले सूर्यको किरणलाई रिफ्लेक्ट गर्छ र सिमेन्ट तात्न दिदैन।
वैज्ञानिकहरूको भनाइ अनुसार, यो प्रविधिले भवनभित्र एयर कन्डिसनिङ्गको आवश्यकता घटाउन सक्छ, जसले ऊर्जाको खपत घटाउने मात्र होइन, कार्बन एमिसन नियन्त्रणमा पनि योगदान पुर्याउनेछ।
अनुसन्धान टोलीका अनुसार यस्तो सिमेन्ट भवन, सडक र पुल जस्ता संरचनामा प्रयोग गर्न सकिनेछ।
हाल यो सिमेन्ट विकासको प्रारम्भिक चरणमै रहेको छ। यसको लागत, दीर्घकालीन टिकाउपन र ठूलो स्तरमा उत्पादनबारे अझै विस्तृत अध्ययन भइरहेको बताइएको छ।
