काठमाडौँ — सञ्चार तथा सूचना प्रविधिमन्त्री पृथ्वी सुब्बा गुरुङले प्रत्येक घरसम्म फोरजी 4G सेवा पुर्याउने काम तीव्र रूपमा अघि बढाउनुका साथै 5G सुरुवातको कार्य तत्काल सुरू गर्न निर्देशन दिएका छन्।
मन्त्रालयमा गत मंगलबार आयोजित नेपाल दूरसञ्चार प्राधिकरण (एनटीए) र नेपाल टेलिकमको आर्थिक वर्ष २०८२/८३ को वार्षिक कार्यक्रम तथा बजेटमाथिको छलफलका क्रममा मन्त्री गुरुङले इन्टरनेट र टेलिफोनमा समस्या हुँदा सरकारले निर्धारण गरेको डिजिटल फ्रेमवर्कका लक्ष्यहरू पूरा गर्न कठिनाई हुने र डिजिटल सुशासन कायम राख्न पनि चुनौतीहरू आउन सक्ने भएकाले दूरसञ्चारको विस्तारमा ढिलाइ नगर्न आग्रहगरेका छन्।
उनले हाइवेहरूमा देखिएको सञ्जाल अवरोध हटाउन नेपाल दूरसञ्चार प्राधिकरण (एनटीए) र टेलिकमको ध्यानाकर्षण गराए। साथै, जनतालाई बढी आवश्यक पर्ने क्षेत्रमा सेवाको पहुँच विस्तारमा प्राथमिकता दिनुपर्ने उनले बताए।
पर्यटन प्रवर्द्धनमा इन्टरनेट र टेलिफोन जस्ता सेवा अत्यन्तै आवश्यक रहेको उल्लेख गर्दै उनले प्रमुख पर्यटकीय गन्तव्यहरूमा सेवा विस्तार प्रभावकारी बनाउन निर्देशन दिए। साथै, शिक्षा र स्वास्थ्य क्षेत्रमा समेत नेपाल टेलिकमको गतिविधि न्यून रहेको भन्दै त्यसको प्रचारप्रसार बढाउन आग्रह गरे।
सो अवसरमा सञ्चार सचिव राधिका अर्यालले सूचना प्रविधिको क्षेत्रमा इनोभेटिभ काम गर्दै आएका युवाहरूलाई प्रोत्साहित गर्ने खालको कार्ययोजना तयार गर्न एनटीएलाई निर्देशन दिइकी छन्।
एनटीए अध्यक्ष भूपेन्द्र भण्डारीले ५जी सेवा सञ्चालनको काम अन्तिम चरणमा पुगेको जानकारी दिँदै चाँडै नै बोलपत्र प्रक्रिया सुरू गरिने बताए।
त्यस्तै, नेपाल टेलिकमका कार्यवाहक प्रबन्ध निर्देशक सबिना मास्के (प्रधान) ले हाल फोरजी विस्तारको काम जारी रहेको र ५जी सेवा सुरू गर्न तयारी भइरहेको जानकारी दिइन्।
