काठमाडौं। रौतहट जिल्लाको गरुडा नगरपालिका–९ स्थित श्रीपुर माध्यमिक विद्यालयमा एक शिक्षकले आफ्नै छात्रालाई अनुचित जन्मदिनको सन्देश पठाएको आरोपमा प्रहरीले सो शिक्षकलाई नियन्त्रणमा लिएको छ।
विद्यालयका शिक्षक रवीन्द्र प्रसाद साहले कक्षा १० की १६ वर्षीया छात्रालाई “Happy Birthday, Meri Jaan” भन्दै सन्देश पठाएको खबर सार्वजनिक भएपछि गत आइतबार बिहानैदेखि विद्यालयमा आक्रोशित विद्यार्थी, अभिभावक र स्थानीयवासीहरू भेला भएका थिए। शिक्षकमाथि कुटपिट हुनुका साथै विद्यालय परिसरमा ढुङ्गामुढा गरी तोडफोडसमेत गरिएको थियो। आक्रोशित भीडले शिक्षकमाथि कडा कारवाहीको माग गर्दै व्यापक विरोध प्रदर्शन गरेको हो।
गरुडा क्षेत्र प्रहरी कार्यालयका निरीक्षक ओमप्रकाश यादवको नेतृत्वमा प्रहरी टोली घटनास्थलमा पठाइएको थियो। स्थिति नियन्त्रणमा लिन प्रहरीले एक राउन्ड आंसूग्यास प्रहार गर्नुपरेको जिल्ला प्रहरी कार्यालय रौतहटका डीएसपी राजन कार्कीले जानकारी दिएका छन्।
घटनापछि विद्यालयका सबै विद्यार्थी र शिक्षकहरूलाई घर पठाइएको थियो भने शिक्षक साहलाई प्रहरीले नियन्त्रणमा लिएको छ।
