काठमाडौं । भारतीय बलिउड अभिनेत्री दीपिका पादुकोनले सामाजिक सञ्जाल इन्स्टाग्राममा पोस्ट गरेको एक रीलले १.९ अर्बभन्दा धेरै भ्यूज पाएको छ। यो अहिलेसम्मकै विश्वभरि सबैभन्दा बढी हेरिएको इन्स्टाग्राम रील हो।
सो रील होटल ‘हिल्टन’ सँगको सहकार्यमा बनाइएको विज्ञापन हो, जसमा ‘It Matters Where You Stay’ भन्ने नारासहितको दृश्य श्रृंखला समावेश गरिएको छ। दीपिका हिल्टनको ग्लोबल एम्बेसडर पनि हुन्, र यही अभियान अन्तर्गत उक्त रील निर्माण गरिएको हो।
करिब ८ हप्ताअघि सार्वजनिक गरिएको उक्त रीलमा दीपिकालाई होटलको वातावरणमा विश्राम गरिरहेको, मिटिङमा सहभागी भइरहेको, रेड कार्पेटको तयारी गर्दै र विभिन्न कार्यक्रममा व्यस्त देखाइएको छ। यति छोटो समयमा १.९ अर्ब भ्यूज प्राप्त गर्नु विश्व स्तरमै उल्लेखनीय मानिएको छ। यो संख्याले हार्दिक पाण्ड्या र BGMI को रील (१.६ अर्ब), “Flex Your New Phone” ट्रेन्ड (१.४ अर्ब) र फुटबल स्टार क्रिस्टियानो रोनाल्डोको आइस डिप भिडियो (५०३ मिलियन) जस्ता चर्चित रीलहरूलाई समेत उछिनेको छ।
दीपिकाको यो सफलता फ्यानहरूबीच पनि चर्चा योग्य विषय बनेको छ। केही प्रयोगकर्ताहरूले उनलाई “Queen for a reason” भन्दै प्रशंसा गरेका छन् भने अन्यले २ अर्ब भ्युज चाँडै पुग्ने अपेक्षा व्यक्त गरेका छन्। सामाजिक सञ्जाल इन्स्टाग्राममा दीपिकाका ८० मिलियनभन्दा बढी फलोअर्स छन्, जसले गर्दा पनि प्राप्त भ्युअर संख्यामा महत्वपूर्ण भूमिका खेलेको मानिन्छ।
दीपिकाको यो नयाँ कीर्तिमानले विश्वभरका दर्शकमाझ उनको लोकप्रियता र ब्रान्ड प्रभाव अझ मजबुत बनाएको छ।
