काठमाडौं । बागमती प्रदेशमा दर्ता भएका सवारी साधनहरुको हकमा अब भौतिक ‘ब्लुबुक ‘ बोकेर हिड्नु पर्ने बाध्यता हटेको छ । बागमती प्रदेश सरकारले सवारी साधनको ब्लुबुकमा क्यूआर कोड प्रणाली लागु गरेसँगै अब चालकहरुले ब्लुबुक नै बोकेर हिड्नु पर्ने बाध्यतबाट मुक्ती पाउने भएका हुन् । यस लेखमा हामी डिजिटल ब्लुबुक अर्थात ब्लुबुकको क्युआर कोड कसरी लिन सकिन्छ भन्ने बारे जानकारी दिन गइरहेका छौँ ।
बागमती प्रदेशको श्रम, रोजगार तथा यातायात मन्त्रालयको अधिकारिक वेबसाइट खोल्नुहोस्।
होमपेजमा रहेको ‘हाम्रा सेवाहरू’ खण्डमा जानुहोस् र त्यहाँको ‘ब्लुबुक क्युआर’ अप्सनमा क्लिक गर्नुहोस्।
मोबाइल नम्बर प्रमाणीकरण गर्नुहोस्।
बाँया साइडमा आफ्नो मोबाइल नम्बर राख्नुहोस्।
क्याप्चा (CAPTCHA) भरेर अगाडि बढ्नुहोस्।
मोबाइलमा आएको ६ अङ्कको OTP राखी ‘प्रमाणित’ गर्नुहोस्।
अनुरोध फारम भर्नुहोस्।
फारममा तपाईंको सवारी तथा व्यक्तिगत विवरणहरू राख्नुहोस्। यी विवरणहरू भौतिक ब्लुबुकमा हुन्छन्।
सवारी विवरणहरू: नम्बर प्लेट, यातायात कार्यालय, लट नम्बर, सवारीको प्रकार, निर्माता, मोडल, बनेको मिति, इन्जिन नम्बर, चेसिस नम्बर, रंग, सिट सङ्ख्या, इन्धनको प्रकार, दर्ता मिति, नवीकरण मिति
व्यक्तिगत विवरण: नागरिकता नम्बर, राष्ट्रिय परिचयपत्र (भएमा), जन्म मिति
कागजात अपलोड र अपोइन्टमेन्ट बुक गर्नुहोस्।
सवारी धनीको फोटो अपलोड गर्नुहोस्।
ब्लुबुकका पानाहरूको स्पष्ट फोटो अपलोड गर्नुहोस्।
आफैंलाई अनुकूल हुने मिति छान्नुहोस् र बुकिङ कन्फर्म गर्नुहोस्।
कार्यालय जानुहोस् र QR प्राप्त गर्नुहोस्।
तपाईंले छनोट गर्नुभएको मितिमा ब्लुबुकको सक्कल प्रति र परिचय खुल्ने कागजात (नागरिकता/लाइसेन्स) लिएर कार्यालय जानुहोस्।
कर्मचारीले विवरण रुजु गर्नेछन्।
प्रक्रिया पूरा भएपछि तपाईंको मोबाइलमा QR कोड लिंक आउनेछ।
लिंक क्लिक गर्दा डिजिटल ब्लुबुक QR कोड देखिनेछ – जसलाई मोबाइलमा सेभ वा प्रिन्ट गर्न सकिन्छ।
