काठमाडौं। नेपाल सरकारले आगामी असोज १ देखि दर्ता भएका सबै सवारी साधनमा इम्बोस्ड नम्बर प्लेट अनिवार्य गर्ने निर्णय गरेको छ। निर्देशन पालना नगरे कारबाही गर्ने भनिएकाले अहिले धेरै सवारीधनी इम्बोस्ड नम्बर प्लेट जडान गर्न दौडधुपमा छन्। तर, कतिपय सवारीधनीलाई इम्बोस्ड नम्बर प्लेट कसरी र कहाँबाट जडान गर्न सकिन्छ भन्ने कुरामा आझै स्पष्ट जानकारी नभएको देखिन्छ।
इम्बोस्ड नम्बर प्लेट लिने प्रक्रिया:
स्टेप १. अनलाइन फोर्म भर्ने
- सबैभन्दा पहिला hsenp.dotm.gov.np मा गएर अनलाइन फर्म भर्नुपर्छ।
- hsenp.dotm.gov.np मा गएर ‘Get Started’ विकल्प क्लिक गर्नुहोस्।
- त्यसपछि गाडीको दर्ता नम्बर (Registration Number) र दर्ता भएको दिन (Registration Date) भर्नुहोस् र Continue मा क्लिक गर्नुहोस्।
- अब आफ्नो मोबाइल नम्बर भर्नुहोस्। तपाईले भर्नु भएकै नम्बरमा ६ अंकको OTP प्राप्त गर्नु हुने छ। प्राप्त गर्नु भएको नम्बर भर्नुहोस्।
- त्यसैगरी आफ्नो इमेल ठेगाना राखेर प्राप्त भेरिफिकेसन कोड हाल्नुहोस्। यो स्टेप अनिवार्य नभएकाले स्किप पनि गर्न सक्नु हुनेछ।
- अब सवारीको विवरण भर्नु पर्ने हुन्छ। यी विवरण बिल बुकमा पाउन सक्नु हुन्छ।
- त्यसैगरी सवारीधनीको पनि विवरण भर्नुहोस्। व्यक्तिगत सवारीधनी हुनुहुन्छ भने Owner Type को Individual Owner सेक्शनमा विवरण भर्नुहोस्। सवारी बैंकको लोन लिएर लिइएको हो भने बैंकको नाम पनि खुलाउन पर्ने हुन्छ। यदि सवारी संस्थाको भएमा सोहि अनुसार विवरण भर्नुहोस्।
- त्यसपछि आवश्यक डकुमेन्टहरु अपलोड गर्नुपर्ने हुन्छ।
आवश्यक डकुमेन्टहरु निम्न अनुसार रहेका छन् :
- सवारीधनी व्यक्ति भएमा नागरिकताको प्रतिलिपि।
- सवारीसाधन कम्पनी वा सरकारी कार्यालयको नाममा भएमा, कम्पनी दर्ता प्रमाणपत्रको प्रतिलिपि, प्यान तथा भ्याट प्रमाणपत्र।
- बैंकबाट खरिद गरेको सवारी भएमा सम्बन्धित बैंकको सहमति-पत्र।
- सवारी धनी र दर्ता सम्बन्धी विवरण भएको ब्लु बुकको प्रतिलिपि।
- चालु आर्थिक वर्षको सवारी कर चुक्ता भएको प्रमाण।
- सवारी साधन दर्ता प्रमाणपत्रको प्रतिलिपि।
- सबै डकुमेन्टहरु अपलोड गरेपछि Next मा क्लिक गर्नुहोस्। यहाँ तपाईले भर्नु भएको जानकारी फेरी एकपटक हेर्नु सक्नु हुनेछ। कुनै जानकारी गलत भएमा ‘Correction and Resubmit’ विकल्प चयन गरि आवश्यक जानकारी सच्याउन सकिन्छ। सबै जानकारी सहि भएमा Submit गर्नुहोस् अनि फर्म डाउनलोड गर्नुहोस्।
स्टेप २. दस्तुर बुझाउने:
तोकिएको बैंकमा निम्न अनुसार को दस्तुर बुझाउन पर्ने हुन्छ।
- दुईपांग्रे सवारी: २,५०० रुपैयाँ
- तीनपांग्रे सवारी: २,९०० रुपैयाँ
- साना/मझौला चारपांग्रे सवारी: ३,२०० रुपैयाँ
- ठूला सवारी: ३,६०० रुपैयाँ
स्टेप ३. दस्तावेज र फाराम बुझाउने:
सम्बन्धित यातायात कार्यालयको ‘दर्ता तथा प्रमाडिकरण साखा’ मा निम्न उल्लेखित कागजात लिएर जानु पर्छ।
- भरेको अनलाइन फर्मको प्रिन्ट
- २ वटा पासपोर्ट साइजको फोटो ( दुई भन्दा बडी सवारीधनी भएको हकमा कुनै एकजना को नाम फर्ममा उल्लेख गरि सोहि अनुसार को फोटो फर्ममा टास्न सकिन्छ। )
- दस्तुर तिरेको रसिद
- सवारी र सवारीधनीको विवरण खुलाउने निम्न उल्लेखित कागजात हरु :
- सवारीधनी व्यक्ति भएमा नागरिकताको प्रतिलिपि।
- सवारीसाधन कम्पनी वा सरकारी कार्यालयको नाममा भएमा, कम्पनी दर्ता प्रमाणपत्रको प्रतिलिपि, प्यान तथा भ्याट प्रमाणपत्र।
- बैंकबाट खरिद गरेको सवारी भएमा सम्बन्धित बैंकको सहमति-पत्र।
- सवारी धनी र दर्ता सम्बन्धी विवरण भएको ब्लु बुकको प्रतिलिपि।
- चालु आर्थिक वर्षको सवारी कर चुक्ता भएको प्रमाण।
- सवारी साधन दर्ता प्रमाणपत्रको प्रतिलिपि।
पेस गरिएको विवरण सहि देखिएमा निवेदन दर्ता तथा प्रमाणित हुने बताइएको छ। त्यसपछि फर्मको सेवाग्राही प्रति (Customer Copy) पाउन सकिन्छ।
स्टेप ४. बायोमेट्रिक प्रक्रिया:
निवेदन दर्ता तथा प्रमाणितपछि एसएमएसमार्फत बायोमेट्रिकका लागि जानकारी प्राप्त हुनेछ। तोकिएको समय र कार्यालयमा गएर बायोमेट्रिक प्रक्रिया पूरा गर्नुपर्छ। बायोमेट्रिकका लागि निम्न उल्लेखित कागजात आवश्यक हुन्छन्।
- सवारी धनीको सक्कली नागरिकता, वा राष्ट्रिय परिचय पत्र, वा सवारी चालक अनुमति पत्र
(नोट : संस्थाको स्वामित्वमा भएको सवारीको हकमा बायोमेट्रिक गर्नु नपर्ने बताइएको छ। दुई वा दुई भन्दा बढी सवारीधनी भएको खण्डमा सबैको लिखित सहमतिमा कुनै एकजना सवारीधनीको बायोमेट्रिक गर्न सकिन्छ।)
स्टेप ५. नम्बर प्लेट जडान:
सबै प्रक्रिया पूरा भएपछि सवारी साधनमा इम्बोस्ड नम्बर प्लेट जडान हुनेछ। सक्कली सवारी दर्ता प्रमाण पत्र र सवारी सहित जडान तथा वितरण साखामा जानु पर्ने हुन्छ।
यातायात व्यवस्था विभागका निर्देशक नरहरि तिवारीले टेकमाकुरालाई जानकारी दिए अनुसार, हाल इम्बोइसड नम्बर प्लट जडान प्रक्रिया, काठमाडौँको सन्दर्भमा :
- ४ पांग्रे सवारी साधन को हकमा एकान्तकुना यातायात कार्यालय, र
- २ पांग्रे सवारी साधन को हकमा कलंकी गुर्जुधारामा रहेको यातायात कार्यालयमार्फत कामहरु भैरहेको छ।
सरकारले इम्बोस्ड नम्बर प्लेटको जडान अनिवार्य गरे पनि सवारीधनीहरुले भने यसको दस्तुर महँगो भएको भन्दै विरोध जनाएका छन्।
