काठमाडौं, । नेपाली बजारमा विद्युतीय सवारीको विस्तार तीव्र गतिमा अघि बढिरहेको छ। व्यवसायिक प्रयोजनका लागि प्रयोग हुने पिकअप भ्यान पनि अब पेट्रोल वा डिजेलमा मात्र आश्रित छैनन्। दिगो, कम खर्चिलो र वातावरणमैत्री सवारीको माग बढेसँगै नेपालमा विभिन्न कम्पनीहरूले विद्युतीय पिकअप भ्यानहरू बजारमा ल्याएका छन्। यस्ता सवारीहरू खासगरी सामान ढुवानी, निर्माण सामग्रीको ढुवानी, डेलिभरी र ग्रामीण यातायातका लागि उपयुक्त छन्। यस लेखमा नेपालमा उपलब्ध आठवटा इभी पिकअप भ्यानहरूको विवरण प्रस्तुत गरिएको छ।
१. Cargo Van EV:
Foton Nepal को ‘Cargo Van EV’ नेपालमा MAW वृद्धी कमर्शियल भेइकलमार्फत भित्रिएको हो। यसमा ५०.२३ किलोवाट आवरको LFP ब्याट्री राखिएको छ, जसले एकपटकको चार्जमा २८० किलोमिटरसम्म यात्रा गर्न सक्ने दाबी गरिएको छ। पेलोड क्षमता ११५० केजी रहेको यो भ्यानको ग्राउण्ड क्लियरेन्स १६३ मिलिमिटर मात्र भएकाले अप्ठ्यारा बाटोभन्दा सहरी र अर्ध-शहरी क्षेत्रमा प्रयोग गर्न उपयुक्त देखिन्छ। LFP ब्याट्री टिकाउ र सुरक्षित मानिने भएकाले चार्जिङ स्टेसन कम भएका ठाउँमा पनि यो भरपर्दो विकल्प हुनसक्छ। यसको मूल्य ४७ लाख ५० हजार रुपैयाँ निर्धारण गरिएको छ।
२. TM1 EV:
त्यसैगरी, Foton कै अर्को मोडेल TM1 EV को ब्याट्री क्षमता केही कम — ३८.६४ कWh भए पनि, समान २८० किलोमिटरको रेन्ज प्रदान गर्छ। यसको पेलोड क्षमता भने उच्च अर्थात् १२५० केजी छ, जुन ठूलो व्यवसायिक प्रयोजनका लागि लाभदायक छ। ग्राउण्ड क्लियरेन्स १७५ मिलिमिटर भएकाले TM1 ले ग्रामीण क्षेत्रमा पनि सहज सवारी दिन सक्छ। यसको मूल्य तुलनात्मक रूपमा सस्तो — ३३ लाख ९९ हजार रुपैयाँ मात्र भएकाले साना तथा मध्यम व्यवसायिक प्रयोगकर्ताका लागि यो एक उत्कृष्ट विकल्प हुनसक्छ।
३. TATA ACE EV:
टाटा कम्पनीको ‘TATA ACE EV’ नेपालमा सिप्रदी ट्रेडिङमार्फत उपलब्ध छ, जुन सबैभन्दा सस्तो विद्युतीय पिकअप भ्यान हो। यसको मूल्य २३ लाख २९ हजार रुपैयाँ मात्र छ। यो सवारी सानो–सहर, बजार क्षेत्र वा डेलिभरी व्यवसायका लागि उपयुक्त देखिन्छ। यसको ब्याट्री क्षमता २१.३ कWh हो, जसले १५५ किलोमिटरको प्रमाणित दूरी तय गर्न सक्छ। ग्राउण्ड क्लियरेन्स १६० मिलिमिटर र पेलोड क्षमता ६०० केजी भएकाले यो हल्का लोड बोक्न र छोटो दूरीको व्यावसायिक कामका लागि आदर्श विकल्प हो।
४. SUNLOG EVU 3:
यस पिकअप भ्यानको ब्याट्री क्षमता ४२ कWh छ, जसले २८६ किलोमिटर यात्रा गर्न सक्ने क्षमता राख्छ। यो भ्यानको पेलोड क्षमता १४०० केजी छ, जुन यो सूचीकृत सबै EV पिकअपमध्ये सबैभन्दा धेरै हो। यसको ग्राउण्ड क्लियरेन्स १८० मिलिमिटर रहेको छ, जसले गर्दा सामान्य ग्रामीण भेगमा पनि सजिलै संचालन गर्न सकिन्छ। टिकाउ ब्याट्री र उच्च पेलोड क्षमताका कारण यो निर्माण क्षेत्र वा भारी सामान ढुवानी गर्ने व्यवसायीका लागि उपयुक्त मानिन्छ। यो सवारी नेपालमा Blue Cooperation Pvt. Ltd. द्वारा आयात गरिएको हो।
५. SOKON EC36:
यो भ्यानमा ४२ कWh क्षमताको विश्वप्रसिद्ध CATL ब्याट्री राखिएको छ जसले ३०० किलोमिटरको दूरी तय गर्न सक्छ। १८८ मिलिमिटर ग्राउण्ड क्लियरेन्स र १००० केजी पेलोड क्षमतासहित यो सवारी दुर्गम तथा असहज बाटोमा पनि सहजै गुड्न सक्छ। टिकाउ ब्याट्री र लामो रेन्जका कारण चार्जिङ स्टेसनहरू कम रहेका स्थानहरूमा पनि यो उपयुक्त विकल्प हुनसक्छ। यसको मूल्य ४५ लाख ५० हजार रुपैयाँ छ। नेपालमा यसलाई MAW Vriddhi Commercial Vehicle Pvt. Ltd. द्वारा आयात गरिएको हो।
६. SRM EV:
VG Motors Nepal ले बजारमा ल्याएको SRM EV को दुई फरक संस्करण उपलब्ध छन् — दुई सिटे र पाँच सिटे। दुई सिटे SRM EV मा ४२ कWh ब्याट्री प्रयोग गरिएको छ जसले ३०० किलोमिटर दूरी पार गर्न सक्छ। १८० मिलिमिटर ग्राउण्ड क्लियरेन्स र ११०० केजी पेलोड क्षमतासहित यो सवारी हलुका–मध्यम लोड बोक्न सक्ने तथा ग्रामीण क्षेत्रका लागि उपयुक्त मानिन्छ। यसको मूल्य ३४ लाख रुपैयाँ तोकिएको छ। त्यस्तै, पाँच सिटे SRM EV मा झण्डै समान ब्याट्री क्षमता — ४१.८६ कWh — दिइएको छ र यसले पनि ३०० किलोमिटर दूरी पार गर्न सक्छ। यात्रु तथा सामग्री दुबै बोक्न मिल्ने बहुप्रयोगी विशेषताका कारण यो सवारी परिवारसहित सवारी वा मिश्रित उपयोगका लागि आकर्षक विकल्प बन्न सक्छ। यसको मूल्य ३६ लाख रुपैयाँ रहेको छ।
७. Riddara RD6:
यस सूचिको सबैभन्दा प्रिमियम EV हो Riddara RD6, जुन CG Motors द्वारा नेपालमा भित्राइएको हो। यो सवारी दुई संस्करणमा उपलब्ध छ — RWD र 4WD। RWD मा ६३ कWh र 4WD मा ७३ कWh क्षमताको LFP ब्याट्री राखिएको छ, जसले क्रमशः ३७७ र ४२४ किलोमिटरको रेन्ज दिन सक्छ। RD6 को ग्राउण्ड क्लियरेन्स २२५ मिलिमिटर छ — जुन यो सूचीमा सबैभन्दा उच्च हो — जसले गर्दा यो सवारी दुर्गम पहाडी तथा नदी नाला पार गर्नुपर्ने कठिन भूगोलमा पनि सजिलै गुड्न सक्छ। यसको पेलोड क्षमता १०५० केजीसम्म छ र मूल्य ६६ लाख ९९ हजारदेखि ८२ लाख ९९ हजार रुपैयाँसम्म छ। यसमा स्मार्ट फिचरहरू, एडभान्स सेफ्टी सिस्टम (ADAS), 540 डिग्री क्यामेरा र मल्टिपल ड्राइभ मोडहरू समेत उपलब्ध छन्, जसले यसलाई उच्च प्राविधिक र विश्वसनीय सवारी बनाउँछ।
