काठमाडौं — गायिका एलिना चौहानसँगको सम्बन्धविच्छेदपछि सार्वजनिक रुपमा पहिलोपटक आफ्नो भनाइ सार्वजनिक गर्दै विष्णु सापकोटाले सामाजिक सञ्जालबाट भइरहेको चरित्र हत्या र मानसिक पीडाविरुद्ध कानुनी उपचार खोजिरहेको स्पष्ट पारेका छन्।
सापकोटाले टिकटकलगायत डिजिटल प्लेटफर्महरूमा डिभोर्ससँग जोडेर बनाइएका भिडिओ, अमर्यादित टिप्पणी र गलत प्रचारले आफ्नो व्यक्तिगत जीवन, परिवार र सामाजिक प्रतिष्ठामा गम्भीर असर पारेको जनाएका छन्।
“सम्बन्धविच्छेद आपसी समझदारीमा भएको हो, र अदालतको निर्णयपछि पुनः यसबारे सार्वजनिक बहस गर्नु न्यायको अपमान हो,” उनले सामाजिक सञ्जालमार्फत जारी विज्ञप्तिमा उल्लेख गरेका छन्।
साथै उनले आफूले अस्ट्रेलियामा मानहानीसम्बन्धी कानुनी प्रक्रिया अघि बढाएको जानकारी दिएका छन्। उनका अनुसार पछिल्ला केही महिना यता सामाजिक सञ्जालमा लगातार आफूविरुद्ध हुने आधारहीन आक्षेप, धम्कीपूर्ण सन्देश र सार्वजनिक चरित्र हत्या गर्ने प्रयासहरूले उनलाई गम्भीर मानसिक तनावमा पारेको छ।
सापकोटाले सामाजिक सञ्जाल प्रयोगकर्तालाई संयमित रहन आग्रह गर्दै, व्यक्तिगत जीवनको सम्मान गर्न र कानुनी मार्ग रोज्नुपर्ने अवस्था आउन नदिन सतर्क रहन अपिल समेत गरेका छन्।
“मौन बसेको मतलब कमजोर छु भन्ने होइन,” उनले लेखेका छन्, “कानुन सबैका लागि बराबर हो र म त्यसैको सहारा लिँदैछु।” ।
यो घटनाले सामाजिक सञ्जाल र प्रविधिको दुरुपयोगले कसरी कसैको व्यक्तिगत र व्यावसायिक छविमा गहिरो चोट पुर्याउन सक्छ भन्ने कुरामा गम्भीर प्रश्न उठाएको छ।
