काठमाडौं। नेपालमा पहिलोपटक विद्युतीय उड्ने कार (Electric VTOL UAV) भित्राइएको छ। । यो अत्याधुनिक सवारीसाधन आगामी नाडा अटो शो–२०२५ मा प्रदर्शन गरिने भएको हो। ‘Go for More’ भन्ने नारासहित भदौ ३ देखि ८ गतेसम्म काठमाडौंको भृकुटीमण्डप प्राङ्गणमा उक्त प्रदर्शनी हुने निश्चित भएको छ ।
आयोजकका अनुसार उड्ने कारको नाम DeePal EV‑TOL UAV रहेको छ । उक्त उड्ने कार कार्यक्रममा एमएडब्ल्यू वृद्धि अटो कर्प प्रालि, दींपाल ईभीको आधिकारिक वितरकका रूपमा सहभागी हुनेछ।
एमएडब्ल्यू वृद्धि अटो कर्प प्रालिका प्रतिनिधि विवेक शिकारियाले आगामी अटो शोमा यो उड्ने कार प्रदर्शनमा राख्दै कम्पनीले आफूलाई भविष्यमुखी र दूरदर्शी प्रस्तुत गर्न चाहेको बताएका छन्न । उनले यो प्रदर्शनी अहिलेसम्मकै सबैभन्दा रोमाञ्चक हुने विश्वास व्यक्त गर्दै उत्कृष्ट अटोमोबाइलहरू र भविष्यका प्रविधिहरू अवलोकन गर्ने अवसर उपलब्ध हुने जानकारी दिए।
दर्शकहरूले सो प्रदर्शनी अवलोकन गर्न खल्ती एप प्रयोग गरी इलेक्ट्रोनिक माध्यमबाट अग्रिम टिकट खरिद गर्न सक्ने व्यवस्था गरिएको छ।
प्रेस विज्ञप्तिमा उल्लेख भए अनुसार, तीन लाख वर्गफुट क्षेत्रफल र १,६२,५०० वर्गफुट प्रदर्शनी क्षेत्रसहित यो नेपालकै अहिलेसम्मकै सबैभन्दा ठूलो अटो शो हुनेछ। साथै, नेपाललाई दक्षिण एसियामा अटो प्रदर्शनीमा उड्ने कार प्रदर्शन गर्ने पहिलो देश बनाउने योजना पनि यसै अन्तर्गत रहेको छ।
विद्युतीय यस कार ठाडो उडान (Vertical Take-Off and Landing – VTOL) गर्न सक्षम रहेको बताइएको छ, जसले सहरी हवाई गतिशीलतामा क्रान्तिकारी परिवर्तन ल्याउन सक्ने विश्वास व्यक्त गरिएको छ। चीनमा विकसित यसको EV-TOL प्रविधि विश्वव्यापी रूपमा अग्रगामी मानिन्छ र त्यहाँका कम्पनीहरूले यसलाई परीक्षण उडान अनुमतिसहित प्रयोगमा ल्याइसकेका छन्।
यद्यपि, नेपालमा यस्तो उड्ने कार सञ्चालनका लागि कानुनी तथा नीति व्यवस्था स्थापना हुन बाँकी रहेको नाडा अध्यक्ष करण चौधरीले बताए। उनले भने, “अहिलेका लागि यो कार केवल प्रदर्शनीमै सीमित रहनेछ र भविष्यमा यसका लागि विशिष्ट नीति निर्माण आवश्यक पर्नेछ।”
