काठमाडौँ । डिजिटल नेपाल कन्क्लेभ, २०२५ को अवसर पारेर गुगल म्याप्सले आज देखि नेपालमा स्ट्रिट भ्यु सेवा सुरु गरेको छ। यस सुविधामार्फत विश्वभरका प्रयोगकर्ताले नेपालका भौगोलिक दृश्य, सांस्कृतिक सम्पदा र जीवन्त वातावरण भर्चुअल रूपमा अवलोकन गर्न सक्नेछन्।
स्ट्रिट भ्यु मार्फत अब उपयोगकर्ताले काठमाडौँका साँघुरा गल्ली, तराईका शान्त क्षेत्रहरू, हिउँले ढाकिएका हिमालका मनोरम दृश्य र घुमाउरा सडकहरूमा भर्चुअल यात्रा गर्न सक्नेछन्। यस सुविधाले नेपालका प्राचीन मन्दिर, दरबार, बजार तथा परम्परागत जीवनशैली नजिकबाट अनुभव गर्ने अवसर पनि प्रदान गर्नेछ। यस सुरुवातले नेपालको सांस्कृतिक र पर्यटन सम्पदाको प्रवर्द्धनमा महत्वपूर्ण भूमिका खेल्ने विशेषज्ञहरूको भनाइ छ।
गुगल स्ट्रिट भ्यु कसरी प्रयोग गर्ने?
नेपालका दृश्यहरू भर्चुअल रूपमा हेर्नको लागि तलका चरणहरू पालना गर्नुहोस्:
१. आफ्नो फोन वा कम्प्युटरमा गुगल म्याप्स खोल्नुहोस्।
२. कम्प्युटरमा तल दायाँ कुनामा रहेको पहेँलो रंगको ‘Street View’ Pegman आइकन क्लिक गर्नुहोस्। मोबाइलमा भने प्रोफाइल आइकन मुनि रहेको ‘Layers’ विकल्पमा जानुहोस् र Street View चयन गर्नुहोस्।
३. हेर्न चाहेको स्थानमा Pegman आइकन राख्नुहोस्।
४. स्क्रीनमा देखिएका दिशा निर्देशन अनुसार क्लिक गरेर आफ्नो इच्छित तर्फ यात्रा गर्नुहोस्।
यसरी 360° दृश्यमा सडक, गल्ली वा पर्यटकिय स्थलको वरिपरिको वातावरण नजिकबाट अवलोकन गर्न सकिन्छ।
यस सुविधा प्रयोग गर्दा सवारी साधनका नम्बर प्लेटहरू र मानिसहरूको अनुहारहरू गोप्य राखिन्छन्। साथै, आफ्नो घर स्ट्रिट भ्युमा देखाउन मन नपरेमा ब्लर गराउन अनुरोध गर्न सकिन्छ। सुरक्षा कारणले गर्दा पशुपति मन्दिरजस्ता संवेदनशील तथा सुरक्षित क्षेत्रभित्र भने प्रवेश गर्न पाइने छैन।
हेर्नुहोस्, गुगल म्यापको स्ट्रिट भ्युबाट लिईएको काठमाडौंका विभिन्न पर्यटन स्थलहरुको तस्विरहरु :
