काठमाडौं । जिल्ला प्रहरी परिसर काठमाडौंले अघिल्लो वर्ष (२०८०/८१) को तुलनामा यस आर्थिक वर्ष २०८१/८२ मा अपराधका घटना ०.३३ प्रतिशतले वृद्धि भएको जनाएको छ।
आज आयोजित पत्रकार सम्मेलनमा काठमाडौं प्रहरीले यस आर्थिक वर्ष (२०८१/८२) मा १२ हजार ९१५ अपराधका घटना दर्ता भएको जानकारी दिएका छन्। प्रमुख एसएसपी विश्व अधिकारीका अनुसार दर्ता भएका उजुरीमध्ये सबैभन्दा बढी बैंकिङ कसुर रहेका छन्। त्यसपछि क्रमशः अभद्र व्यवहार, चोरी, ठगी, लागूऔषध सम्बन्धी अपराध, आत्महत्या, जबरजस्ती करणी र ज्यानमार्ने उद्योग लगायतका घटनाहरू रहेका छन्।
एसएसपी अधिकारीका अनुसार अपराधका घटना बढ्दो क्रममा रहे पनि प्रहरी जनशक्ति अपुग रहेको छ। काठमाडौंमा कुल ४ हजार १६ दरबन्दीमध्ये हाल ३ हजार २३३ जना मात्र कार्यरत छन्। उनले जनशक्ति कम हुँदाहुँदै पनि शान्ति सुरक्षामा कमी हुन नदिने गरी प्रहरी परिचालन गरिएको बताएका छन्।
परिसरले विपद्का घटनामा समेत प्रभावकारी ढंगले काम गरिरहेको जनाएको छ। स्थापनाकालमा ४६ वटा सिआरभी भ्यान सञ्चालनमा रहेकोमा हाल ३८ वटा मात्र सञ्चालनमा छन् भने ६३ वटा QRT (Quick Response Team) कार्यरत रहेको काठमाडौं परिसरले जानकारी दिएको छ।
