काठमाडौं । प्रविधि कम्पनी मेटाले कोडिङसम्बन्धी जागिरका लागि आवेदन दिने उम्मेदवारहरूलाई अन्तर्वार्ताको क्रममा कृत्रिम बुद्धिमत्ता (एआई) सहायक प्रयोग गर्न अनुमति दिने भएको छ।
४०४ मिडियाले प्राप्त गरेको मेटाको आन्तरिक सन्देशअनुसार कम्पनीले आफ्ना केही कर्मचारीलाई ‘एआईको सहयोगमा लिइने अन्तर्वार्ता’ को अभ्यास (मोक इन्टरभ्यु) मा सहभागी हुन पनि अनुरोध गरेको छ।
कर्मचारीहरूले अन्तर्वार्ता दिने उम्मेदवारको भूमिकामा अभिनय गर्नेछन्, जहाँ उम्मेदवारले एआई सहायकको सहयोग लिन पाउनेछन्।
मेटाका अनुसार, यो पहल अन्तर्वार्ता प्रक्रियालाई अझ प्रभावकारी बनाउन सकिने उपायको परीक्षणका लागि गरिएको हो। साथै, एआई प्रविधिको प्रयोगले उम्मेदवारहरूको सोच्ने तरिका र समस्या समाधान क्षमतामा के असर गर्छ भन्ने बुझ्न सहयोग पुग्ने अपेक्षा गरिएको छ।
कम्पनीले औपचारिक रूपमा भने अझै पूर्ण विवरण सार्वजनिक गरेको छैन। तर, प्रविधि क्षेत्रमा बढ्दो एआई प्रयोगले मानव संसाधन व्यवस्थापनको शैलीमा समेत परिवर्तन ल्याउन थालेको संकेत यो कदमले दिएको छ।
