काठमाडौँ । सञ्चार तथा सूचना प्रविधि मन्त्री तथा सरकारका प्रवक्ता पृथ्वीसुब्बा गुरुङ ‘विश्व आर्टिफिसियल इन्टेलिजेन्स सम्मेलन २०२५’ मा सहभागी हुन चीनको सांघाई प्रस्थान गर्ने भएका छन् । मन्त्रिपरिषद्को गत सोमबार बसेको बैठकले उनको चीन भ्रमण स्वीकृत गरेको हो ।
उक्त सम्मेलन यही साउन १० देखि १२ गतेसम्म चीनको सांघाईस्थित वर्ल्ड एक्स्पो सेन्टरमा आयोजना हुँदैछ । “एआई युगमा विश्वव्यापी ऐक्यबद्धता” भन्ने मूल नारासहित आयोजना गरिँदै गरेको सम्मेलनलाई विश्वकै अग्रणी तथा प्रभावशाली कृत्रिम बुद्धिमत्ता सम्वन्धी कार्यक्रमका रूपमा लिइएको छ।
सन् २०१८ देखि निरन्तर रूपमा आयोजना हुँदै आएको उक्त सम्मेलनमा विभिन्न देशका प्रमुख वैज्ञानिक, उद्यमी, सरकारी अधिकारी, लगानीकर्ता तथा नीति निर्माता सहभागी हुने गरेका छन् । सम्मेलनले एआई सम्बन्धी पछिल्ला अनुसन्धान, औद्योगिक सहकार्य तथा अन्तर्राष्ट्रिय साझेदारीका लागि साझा मञ्चको भूमिका निर्वाह गर्दै आएको आयोजकले जनाएका छन् ।
