काठमाडौं । विद्युतीय सवारी साधन (ईभी) केन्द्रित नेपालकै सबैभन्दा ठूलो अटो शो ‘नेपाल मोबिलिटी एक्स्पो २०२५’ अब निर्धारित समयभन्दा एक दिन बढी सञ्चालन हुने भएको छ। नेपाल अटोमोबाइल आयातकर्ता तथा निर्माता संघ (नाइमा)ले अवलोकनकर्ताको असाधारण आकर्षणका कारण प्रदर्शनीको अवधि थप्ने निर्णय गरेको हो।
साउन २१ गतेदेखि भृकुटीमण्डपमा सुरु भएको यो प्रदर्शनी प्रारम्भिक योजना अनुसार साउन २५ गतेसम्म चल्ने तय गरिएको थियो। तर, दर्शकको ठूलो सहभागिता र विभिन्न ब्रान्डका स्टलमा देखिएको भीडका कारण आयोजकले एक दिन थपेर अब साउन २६ गते (सोमबार) सम्म सञ्चालन गर्ने घोषणा गरेको हो।
प्रदर्शनीमा विद्युतीय सवारीका क्षेत्रीय तथा अन्तर्राष्ट्रिय ब्रान्डहरूको भव्य सहभागिता छ। चार पाङ्ग्रे ईभी सेग्मेन्टमा बीवाईडी, एस्ट्रोन, फोर्थिङ, ग्रेटवाल मोटर्स, हुन्डाई, केई, किआ, लिपमोटर, एलईभी वन, महिन्द्रा, म्याक्सस, एमजी, ओमोडा, जेइको, प्रोटोन र जिकरजस्ता ब्रान्ड उपस्थित छन्। दुई पाङ्ग्रे सेग्मेन्टमा एथर, गोगोरो, निउ, रिभोल्ट, याडिया र जिहोका मोडेल राखिएका छन्। साथै, व्यावसायिक प्रयोजनका लागि चेरी वान्डा, डोङफेङ, किङलङ, सनलङ, फेरजोन, ह्वाजी, कामा र केरी जस्ता कम्पनीका गाडी पनि प्रदर्शनीमा छन्।
