काठमाडौं — अन्तर्राष्ट्रिय क्रिकेट परिषद् (आईसीसी) ले नेपाललाई आईसीसी डिजिटल फ्यान इनगेजमेन्ट अफ दि इयर २०२४ अवार्ड प्रदान गरेको छ। आईसीसीको वार्षिक साधारण सभा सिंगापुरमा सम्पन्न भएको अवसरमा नेपाललाई उक्त अवार्ड प्रदान गरिएको हो।
सभाना आईसीसी अध्यक्ष जय शाहले नेपाल क्रिकेट संघ (क्यान)का अध्यक्ष चतुरबहादुर चन्द, महासचिव पारस खड्का र कोषाध्यक्ष पदम खड्कालाई अवार्ड हस्तान्तरण गरेका थिए।
आईसीसी विकास श्रेणीअन्तर्गत प्रदान गरिने यस अवार्डमा नेपाल एसिया क्षेत्रको विजेता बन्दै ग्लोबल छनोटमा पुगेको थियो। यससँगै नेपालले दोस्रोपटक यो अवार्ड जित्न सफल भएको हो।
ग्लोबल छनोटको सूचीमा एसियाबाट नेपाल, अफ्रिकाबाट नामिबिया, अमेरिकाबाट बर्मुडा र इस्ट एसिया प्यासिफिकबाट इन्डोनेसिया समावेश भएका थिए। तीमध्ये नेपालले उत्कृष्ट प्रदर्शन गर्दै अवार्ड हात पारेको हो।
नेपाल क्रिकेट संघले डिजिटल माध्यममार्फत दर्शक, समर्थक र फ्यानहरूसँगको सम्पर्क र सहभागिता अभिवृद्धिमा पुर्याएको योगदानको मान्यतास्वरूप यो अवार्ड प्रदान गरिएको हो।
