काठमाडौँ । एनआईसी एशिया बैंक लिमिटेडले बैंकको स्वामित्वमा रहेका बैँकिङ सम्पत्ति, गैर-बैंकिङ सम्पत्ति तथा धितोमा रहेका सम्पत्तिहरूको लिलामी सम्बन्धी विस्तृत जानकारी प्रदान गर्न विशेष अनलाइन लिलामी पोर्टल सार्वजनिक रूपमा सञ्चालनमा ल्याएको छ।
नवीन रूपमा सुरू गरिएको https://auctionassistance.nicasiabank.com पोर्टलमार्फत प्रयोगकर्ताहरूले लिलामीमा रहेका सम्पत्तिहरूको विस्तृत विवरण सजिलै हेर्न सक्नेछन्।
लिलामी सूचना वा नोटिसमा रहेको QR कोड स्क्यान गरेपछि आउने पोर्टलमार्फत सम्बन्धित सम्पत्तिको कित्ता नम्बर, क्षेत्रफल, तस्बिर, नक्सा र गुगल म्यापबाट स्थान विवरणसमेत हेर्न सकिने व्यवस्था गरिएको छ।
त्यस्तै, सम्पत्तिबारे थप जानकारी लिन इच्छुक व्यक्तिहरूका लागि पोर्टलमा ‘सन्देश बाकस’ (Message Box) को सुविधा पनि राखिएको छ। यसमार्फत प्रयोगकर्ताले आफ्नो नाम, इमेल ठेगाना, मोबाइल नम्बर र सम्पर्क ठेगाना राखेर सोधपुछ गर्न सक्नेछन्।
बैंकले लिलामी पोर्टलमा बैंकिङ सम्पत्ति, गैर-बैंकिङ सम्पत्ति तथा धितोमा रहेका सम्पत्तिका सूचना तथा विवरणहरू नियमित रूपमा अद्यावधिक (अपडेट) गरिने जानकारी दिएको छ।
एनआईसी एशिया बैंकले पारदर्शी तथा सहज सूचना पहुँचको लागि सबै इच्छुक व्यक्तिहरूलाई पोर्टल अवलोकन गर्न र लिलामीसम्बन्धी जानकारीको फाइदा लिन आग्रह समेत गरेको छ।
