काठमाडौं। विश्वका शक्तिशाली मुलुकहरूबीच साइबर युद्ध तीव्र बन्दै गएको सन्दर्भमा हालसालै एउटा चकित पार्ने घटना बाहिर आएको छ। केही ह्याकरहरूले उत्तर कोरियाली सरकारसँग सम्बन्धित अपरेटिभलाई पहिचान गरी सार्वजनिक गरेका छन्।
दुई anonymous ह्याकरहरू (उपनाम ‘Saber’ र ‘cyb0rg’) ले उत्तर कोरियाली सरकारले प्रायोजित गरेको ह्याकरको कम्प्युटरमा पहुँच पाएको बताएका छन्। अन्तर्राष्ट्रिय मिडियाका अनुसार, त्यस कम्प्युटरमा अनुसन्धान गर्दा, उक्त ह्याकर उत्तर कोरियाको साइबर जासूसी र आक्रमणसँग जोडिएको प्रमाण भेटाए। Saber र cyb0rg ले ह्याकरको कम्पुटरमा फेला पारेका डाटा सार्वजनिक गरेका छन्। करिब ९ जिबीको उक्त डाटामा पासवर्ड, चोरिएका विवरणहरू र यहाँसम्म कि उत्तर कोरियाली ह्याकरको गुगल सर्च हिस्ट्रीसमेत रहेको बताइएको छ।
Saber र cyb0rg को भनाइ अनुसार, उत्तर कोरियाका राज्यद्वारा सहयोग पाएका ती ह्याकरहरूले लामो समयदेखि विश्वभरका बैंकिङ प्रणाली, क्रिप्टोकरेन्सी एक्सचेन्ज र संवेदनशील संस्थाहरूमाथि आक्रमण गर्दै आएका छन्। यसले अर्बौं डलर बराबरको क्षति मात्र नभई विश्वव्यापी डिजिटल सुरक्षामाथि गम्भीर प्रश्न उठाएको उनीहरू बताउछन्।
विभिन्न रिपोर्टले देखाएअनुसार, उत्तर कोरियाली ह्याकर समूहहरूले आन्तरिक अर्थतन्त्रलाई चलायमान राख्न विश्वभरका वित्तीय संस्थामाथि आक्रमण गर्ने रणनीति अपनाएका छन्।
Saber र cyb0rg ले कसरी ह्याकरको कम्प्युटरमा पहुँच पाए भन्ने कुरा खुलाएका छैनन्। उनीहरूले यही तरिका प्रयोग गरेर अरू प्रणालीहरूमा पनि पहुँच पाउने विश्वास गरेको बताएका छन्।
