काठमाडौं । नेपालमा ओमोडा एन्ड जेइको ब्रान्डको अधिकृत वितरक एसपीजी अटोमोबाइल्सले मनसुन सिजनलाई लक्षित गर्दै ‘मनसुन चेकअप क्याम्प’ सार्वजनिक गरेको छ। कम्पनीले यो सेवा विशेष अफरसहित आगामी असार २५ देखि २७ गतेसम्म सञ्चालन हुने जनाएको छ, जसले सम्पूर्ण नेपालभरका ओमोडा–जेइको प्रयोगकर्तालाई लक्षित गरेको छ।
चेकअप क्याम्पको मुख्य उद्देश्य मनसुनको समयमा सवारी सुरक्षालाई सुनिश्चित गर्नु र नियमित मर्मतसम्भारमार्फत गाडीको कार्यसम्पादनलाई सुदृढ बनाउनु रहेको कम्पनीले जनाएको छ। यस्तो मौसममा गाडीहरू सुरक्षित र सक्षम अवस्थामा सञ्चालनमा रहून् भन्ने हेतुले विभिन्न सर्भिस छुटसहितको यो विशेष सेवा अभियान ल्याइएको हो।
तीनदिने अभियान अवधिभर ग्राहकहरूले सर्भिसिङ गर्दा श्रमिक ज्यालामा पूरै छुट पाउनेछन् भने ब्रेक प्याडको परिवर्तनमा पनि सोही सुविधा उपलब्ध हुनेछ। साथै, टप वास सेवामा पूर्ण छुट दिइनेछ। सस्पेन्सन पार्ट्स परिवर्तन गर्दा श्रमिक शुल्कमा ५० प्रतिशत छुट रहनेछ, भने आवश्यक स्पेयर पार्ट्स किन्नुपर्ने अवस्थामा १० प्रतिशतसम्मको छुट प्राप्त हुनेछ।
कम्पनीका अनुसार, यो योजना राजधानी लगायत देशभर फैलिएका १२ वटा अधिकृत सर्भिस सेन्टरहरूमा एकैसाथ सञ्चालन गरिनेछ। काठमाडौँ उपत्यकाभित्र सीतापाइला र भक्तपुरका सर्भिस सेन्टरहरू समावेश छन् भने उपत्यका बाहिर वीरगञ्ज, बुटवल, नेपालगञ्ज, चितवन, धनगढी, पोखरा, इटहरी, विर्तामोड, दाङ र सुर्खेतका सर्भिस सेन्टरमार्फत सेवा प्रदान गरिनेछ।
कम्पनीले यो अभियानले ग्राहकहरूको सन्तुष्टि अभिवृद्धि गर्नका साथै दीर्घकालीन ब्रान्ड विश्वास निर्माणमा टेवा पुर्याउने अपेक्षा गरेको छ। मौसम परिवर्तनसँगै सवारी सुरक्षामा सचेतना र समयमै मर्मत सम्भारको महत्त्व बढिरहेको अवस्थामा यस्तो अभियानले नेपाली EV प्रयोगकर्तालाई सकारात्मक सन्देश दिने विश्वास लिइएको छ।
