काठमाडौँ । इन्स्टाग्रामले बालबालिकालाई लक्षित गरी सञ्चालन गरिएका अकाउन्टहरू थप सुरक्षित गर्नका लागि सुरक्षा उपायहरू लागू गर्ने घोषणा गरेको छ। मेटाले गत बुधबार सार्वजनिक गरेको जानकारीअनुसार वयस्कहरूले चलाउने तर बालबालिकासँग सम्बन्धित सामग्रीहरू पोस्ट गर्ने अकाउन्टहरूमा अब स्वतः कडा सुरक्षा सेटिङ लागू हुनेछ।
यी सेटिङहरू लागू भएपछि यस्ता अकाउन्टमा नचाहिँदो वा अपरिचित व्यक्तिबाट आउने सन्देशहरू स्वतः रोकिनेछन्। त्यस्तै, ‘हिडन वर्ड्स’ सुविधा पनि स्वतः सक्रिय हुनेछ, जसले आपत्तिजनक शब्द समेटिएका कमेन्टहरूलाई फिल्टर गर्नेछ।
यसै सन्दर्भमा, मेटाले ‘टिन अकाउन्ट’ नामक नयाँ प्रणालीको परीक्षणसमेत सुरु गरेको छ। उक्त प्रणाली अन्तर्गत १६ वर्षमुनिका प्रयोगकर्ताहरूले आफ्नो सुरक्षा सेटिङ परिवर्तन गर्न अभिभावकको अनुमति लिनुपर्नेछ। साथै, यस्ता प्रयोगकर्ताले कसलाई सन्देश पठाउन मिल्छ वा कस्तो सामग्री हेर्न मिल्छ भन्नेमा पनि सीमितता तोकिएको छ।
इन्स्टाग्रामले टिन प्रयोगकर्ताका अकाउन्टहरू स्वतः प्राइभेट बनाइने र राति नोटिफिकेसन नआउने गरी ‘स्लिप मोड’ मा राखिने व्यवस्था पनि ल्याएको छ। यदि कुनै प्रयोगकर्ताले आफ्नो वास्तविक उमेर लुकाएर यस्ता सुरक्षात्मक नियमहरूबाट जोगिन प्रयास गरेमा एआई प्रविधिमार्फत उमेर पहिचान गरिने र सम्बन्धित अकाउन्टमा प्रतिबन्ध लगाइने मेटाले जनाएको छ।
यी नयाँ सुरक्षा उपायहरू आगामी ६० दिनभित्र अमेरिका, बेलायत, क्यानडा र अस्ट्रेलियामा लागू हुने बताइएको छ। पछिल्लो समय सामाजिक सञ्जालहरूमा बालबालिकाको सुरक्षा सम्बन्धी चासो र दबाब बढिरहेका बेला इन्स्टाग्रामले यो कदम चालेको हो।
