काठमाडौं। प्रविधि क्षेत्रमा कृत्रिम बुद्धिमत्ता (AI) को उपयोग तीव्र रूपमा फैलिँदै गएको अवस्थामा, सामसुङले AI युक्त झुम्का, औंठी जस्ता गहनासरहका नयाँ प्रकारका ‘वेयरएबल’ उपकरणहरू विकास गर्ने तयारी गरिरहेको छ।
सामसुङ मोबाइल एक्सपेरिएन्स डिभिजनका प्रमुख सञ्चालन अधिकृत वोन-जुन चोइले CNN सँगको कुराकानीमा भने, “हामी यस्तो उपकरण बनाउने सोचमा छौँ जुन बोकेर हिँड्न नपरोस्, बरु शरीरमै लगाउन मिलोस्।”
उनका अनुसार, कम्पनीले चस्मा, झुम्का, घाँटीमा लगाउने मालाजस्ता गहना, घडी र औंठी जस्ता विकल्पहरूबारे अध्ययन गरिरहेको छ। “कसैले चस्मा लगाउँछन्, कसैले झुम्का, कसैले घडी—हामी यिनै विकल्पहरूको गहिरो विश्लेषण गर्दैछौँ,” चोइले भने।
प्रविधि विश्लेषकहरूका अनुसार, यस्ता ‘AI-पावर्ड’ उपकरणहरूले मोबाइल फोनको विकल्प वा पूरक बन्ने सम्भावना राख्छन्, जुन बिना टाइप वा स्क्रिन स्वाइप प्रयोगकर्ताले सजिलो रूपमा काम गर्न सकून्।
सामसुङ मात्र होइन, मेटा, गुगल, स्न्याप लगायत कम्पनीहरूले पनि स्मार्ट चस्मा विकास गरिरहेका छन्। मेटाको रे-बान चस्मा २०२३ देखि २० लाखभन्दा बढी बिक्री भइसकेको छ भने, OpenAI र एप्पलका पूर्व-डिजाइनर जोनी आइभले पनि नयाँ AI उपकरण निर्माणमा सहकार्य गरिरहेका छन्।
यद्यपि सामसुङले हालै निर्माण गरिएका केही स्टार्टअपका उत्पादनहरूजस्तै, एक्लै काम गर्ने उपकरण भन्दा, आफ्ना स्मार्टवाचजस्तै मोबाइलसँग जोडिएर काम गर्ने ‘सहायक उपकरण’ बनाउने योजना बनाइरहेको छ।
तथापि, चोइले स्पष्ट पारे अनुसार, अहिले अध्ययनरत सबै विकल्पहरू बजारमा आउने छन् भन्ने ग्यारेन्टी छैन। प्रविधि कम्पनीहरूले धेरैजसो अवधारणात्मक (prototype) मोडेल परीक्षण गरेर मात्र अगाडि बढ्ने चलन हुन्छ।
यस्तैमा, एप्पलका पूर्वकर्मचारीहरूले बनाएको ‘Humane AI Pin’ अत्याधिक मूल्य र खराब प्रदर्शनका कारण बजारमै असफल भएको थियो भने ‘Rabbit R1’ पनि कमजोर प्रतिक्रिया पाएपछि हाल सुधारको चरणमा छ। ‘Friend’ नामक अर्को स्टार्टअपले बनाएको AI गहना अझै सार्वजनिक भइसकेको छैन।
सामसुङले भने यी प्रयासहरूबाट सिक्दै, बजारमा स्थायित्व ल्याउन सक्ने, सहज र स्मार्टफोनसँग समन्वय हुने उपकरण ल्याउने तयारी गरिरहेको देखिन्छ। चोइ भन्छन्, “सामान्य चस्मा नलगाउने प्रयोगकर्ताका लागि अन्य विकल्पहरूबारे पनि हामी गम्भीरताका साथ अध्ययन गर्दैछौँ।”
