काठमाडौँ। थाई प्रहरीले करिब ५० मिलियन अमेरिकी डलर बराबरको क्रिप्टो ठगी प्रकरणमा संलग्न एक दक्षिण कोरियाली नागरिकलाई Bangkok को सुवर्णभूमी अन्तर्राष्ट्रिय विमानस्थलमा पक्राउ गरेको छ। ३३ वर्षीय ती युवक ‘हान’ नामले परिचित छन् र उनलाई ठूलो अपराध नेटवर्कमार्फत साधारण लगानीकर्तालाई धोका दिएको आरोप लगाइएको छ।
अनुसन्धानअनुसार हानले सञ्चालन गरेको समूहले कल सेन्टरमार्फत लगानीकर्तालाई झुट्टा प्रलोभन देखाउँदै उच्च नाफा दिने वाचा गरेको थियो। सुरुमा ३० देखि ५० प्रतिशतसम्म फाइदा दिएको देखाइ विश्वास जितेपछि लगानीकर्तालाई थप रकम लगानी गर्न प्रलोभन दिइयो। तर ठूलो धनराशी जम्मा भएपछि भने निकासी रोकिएको र “शर्त पूरा भएन” भनेर लगानीकर्तालाई छलफलमा बोलाइएको पाइएको छ। यसरी उनले सयौं व्यक्तिबाट करिब ४७.३ मिलियन अमेरिकी डलर बराबरको रकम संकलन गरेको बताइएको छ।
अन्तरास्ट्रिय मिडियाका अनुसार, ठगीबाट प्राप्त रकम USDT मा जम्मा गरि, पछि सुनमा परिणत गरिएको थियो। प्रहरीले फेला पारेका तथ्यअनुसार, हानले कम्तीमा १० केजीभन्दा बढी तौलका सुनका बारहरू खरिद गरेका थिए जसको प्रत्येक कारोबार करिब १ मिलियन डलरभन्दा बढी मूल्यको थियो। यसरी सुन प्रयोग गरेर ठगी रकमलाई सजिलै सीमापार गर्न र ट्रयाकिङबाट जोगिने प्रयत्न गरिएको अनुसन्धानकर्ताले बताएका छन्।
मिडियाका अनुसार, थाई अदालतले पक्राउ पुर्जी जारी गरेपछि गत फेब्रुअरी ६ मा उनलाई विमानस्थलमै नियन्त्रणमा लिइएको हो। प्रहरीले उनका मोबाइल फोन र क्रिप्टो वॉलेट पनि जफत गरेको छ। हानमाथि ठगी, कम्प्युटर अपराध, मनी लाउन्डरिङ र आपराधिक गिरोहमा संलग्नताको आरोप लगाइएको छ। यस प्रकरणमा अन्य करिब १० जना संलग्न व्यक्तिहरूलाई समेत प्रहरीले पक्राउ गरेको छ, जसमा मनी लाउन्डरिङ र ‘म्युल एकाउन्ट’ उपलब्ध गराउनेहरू रहेको बताइएको छ।
यो घटनाले फेरि एकपटक विश्वव्यापी रूपमा बढ्दै गएको क्रिप्टो ठगीको जोखिमलाई उजागर गरेको छ। सामान्य नागरिकलाई लोभलाग्दा प्रलोभन देखाएर करोडौं रकम ठगी गर्ने यस्ता गतिविधि लगातार बढ्दै गएको र कानुनी निकायले नियन्त्रणमा लिन थप चुनौतीपूर्ण बनेको यस घटनाले प्रष्ट पार्छ।
