काठमाडौँ। सरकारले अनलाइन ठगी तथा मनी लाउन्डरिङ सम्बन्धी गतिविधिमा तीब्र रुपमा प्रयोग भएको भन्दै गत महिना प्रतिबन्ध लगाएको म्यासेजिङ एप टेलिग्राम, अहिले नेपालमा दर्ता प्रक्रियामा आएको छ।
सञ्चार तथा सूचना प्रविधि मन्त्रालयका प्रवक्ता, गजेन्द्र कुमार ठाकुरले टेकमाकुरालाई बताए अनुसार, गत साता नै टेलिग्रामले नेपालमा दर्ता हुन आवश्यक कागजातसहित निवेदन दिएको हो। पेस गरिएको उक्त निवेदनको निर्णय लिन अब १ साता जति मात्रै लाग्ने उनले बताएका छन्। यस कारण, प्रतिवन्ध लगाइएको Telegram अब एक साता भित्र नै खुल्न सक्ने सम्भावना देखिएको छ।
नेपाल दूरसञ्चार प्राधिकरण (एनटीआरए) ले गत साउन २ मा सबै दूरसञ्चार सेवा प्रदायकलाई टेलिग्राममा पहुँच रोक्न निर्देशन दिएको थियो।
मिडियाका अनुसार, नेपालमा हाल करिब ११ लाख मानिसले टेलिग्राम प्रयोग गर्दै आएका छन्। र यो एप अनलाइनमार्फत लगानी गरे पैसा बढ्छ भन्ने जस्ता ठगीका विषयमा सर्वसाधारणसँग कुराकानी गर्न प्रयोग गरिएको पाइएको थियो । Telegram मा फोन नम्बर लुकाउन मिल्ने भएकाले ठगी गर्नेहरूले यसको फाइदा उठाउने गरेको पनि पाइएको थियो । र यस कारण प्रहरीलाई समेत अपराधी पहिचानमा कठिनाइ हुने गरेको बताइएको छ।
अहिले Telegram दर्ता प्रक्रियामा आएसँगै, प्रतिबन्ध खुल्ने र पहिले भन्दा प्रभावकारी र नियमबद्ध रुपमा प्रयोगमा आउने सम्भावना देखिन्छ।
Telegram दर्ता प्रक्रियामा आगाडी बढे सँगै, नेपालमा दर्ता नभएका Facebook र Instagram जस्ता आरु सामाजिक सञ्जाल पनि दर्ता हुने अपेक्षा गरिएको छ।
