काठमाडौं । अमेरिकाको फ्लोरिडा स्थित एक संघीय ज्यूरीले टेस्लालाई सन् २०१९ मा भएको घातक दुर्घटनाका लागि आंशिक रूपमा दोषी ठहर गर्दै २४३ मिलियन डलर (अन्दाजी ३२ अर्ब नेपाली रुपैयाँ) जरिवाना तिर्न आदेश दिएको छ। यो घटना टेस्लाको अटोपायलट प्रणाली संलग्न भएको एक प्रमुख मृत्यु प्रकरण हो, जसमा कम्पनीले पहिलोपटक ठूलो कानुनी हार बेहोरेको हो। यो फैसला पछि अन्य पीडितहरूले पनि मुद्दा दायर गर्ने सम्भावना समेत बढेको छ।
अप्रिल २५, २०१९ मा जर्ज म्याकगी नामक एक चालकले आफ्नो टेस्ला मोडल S गाडी अटोपायलट मोडमा राखेर चलाइरहेका थिए। गाडी करिब १०० किलोमिटर प्रतिघण्टा को गतिमा रहेको बेला उनले भुइँमा खसिएको मोबाइल फोन टिप्न तल हेरे।
त्यो समयमा गाडीले स्टप साइन र ट्राफिक लाइट उल्लंघन गर्दै एक आर्को गाडीलाई ठक्करा दिएको थियो । उक्त दुर्घटनामा परी २२ वर्षीया नाइबेल बेनाभिडेस लियोनको घटनास्थलमै मृत्यु भएको थियो भने उनका प्रेमी डिलन आङ्गुलो गम्भीर घाइते भएका थिए । उक्त दुर्घटनामा अदालतले टेस्लालाई आंशिक दोषी ठहर गर्दै क्षतिपुर्ती तिर्न आदेश दिएको हो । केवल हाइवेका लागि डिजाइन गरिएको अटोपायलट प्रणालीलाई टेस्लाले सहरका सडकहरूमा प्रयोग गर्नबाट प्रयोगकर्तालाई नरोकेकोमा टेस्लालाई आंशिक दोषी ठहर गरिएको हो ।
जसअनुसार टेस्लाले कुल जरिवानाको ३३ प्रतिशत अर्थात ४२.६ मिलियन डलर र दण्डात्मक जरिवाना स्वरुप २०० मिलियन डलर गरेर कुल करिब २४३ मिलियन डलर जरिवाना तिर्नु पर्ने भएको हो । दुर्घटनामा चालक जर्ज म्याकगी ६७% जिम्मेवार ठहरिए पनि मुद्दामा उनलाई प्रतिवादी नबनाइएको हुनाले उनले भने कुनै रकम तिर्नु पर्ने छैन ।
टेस्लाले यो फैसलासँग कडा असहमति जनाउँदै अपील गर्ने जनाएको छ।
“यो फैसला गलत छ। यसले सवारी सुरक्षामा सुधार ल्याउने र स्वचालित ड्राइभिङ प्रविधि विकास गर्ने प्रयासलाई पछाडि धकेल्छ। दुर्घटना चालकको ध्यान नहुनुका कारण मात्रै भएको हो। त्यतिबेला होस् या अहिले, कुनै पनि गाडीले यो दुर्घटना रोक्न सक्दैनथ्यो।” टेस्लाको भनाइ रहेको छ ।
अदालतको यो फैसलासँगै टेस्लाको सेयर मूल्यमा १.८% ले गिरावट समेत देखिएको छ भने विज्ञहरुका अनुसार यसले थप पीडितहरूलाई अगाडि आउन हौसला दिन सक्ने र भविष्यमा टेस्लाका लागि कानुनी जोखिम झन् बढ्न सक्ने सम्भावना देखिएको छ । यस्तै इलन मस्कको रोबोट्याक्सी र स्वचालित ड्राइभिङ प्रविधि सुरु गर्ने योजनामा पनि यस फैसालाले नकारात्मक असर पार्न सक्ने बताइएको छ । जसलाई टेस्लाको दीर्घकालीन रणनीतिको रुपमा हेरिदै आइएको छ ।
