काठमाडौं — अमेरिकाका राष्ट्रपति डोनाल्ड ट्रम्पले बराक ओबामालाई पक्राउ गरिरहेको जस्तो देखिने एआइ भिडियो सार्वजनिक गरेका छन्। ट्रम्पले आज सामाजिक सञ्जाल ट्रुथ सोसलमा राखेको यो भिडियोमा ओबामा र डेमोक्रेटिक पार्टीका अन्य नेताहरूलाई अमेरिकाको संघीय अनुसन्धान ब्यूरो (एफबिआई) ले पक्राउ गरिरहेको देखाइएको छ।
त्यो एक मिनेट लामो भिडियोमा ओबामाले भनेका छन्, “कोही पनि विशेष गरेर राष्ट्रपति पनि कानुन भन्दा माथि छैनन्,,” र यसपछि जो बाइडेनसहितका अन्य डेमोक्रेटहरूले पनि “कसैलाई पनि कानूनमाथि रहन दिइँदैन” भनेको सुन्न सकिन्छ।
यो भिडियो यस्तो अवस्थामा सार्वजनिक भएको छ जब अमेरिकी राष्ट्रिय खुफिया एजेन्सीका निर्देशक तुलसी गबार्डले ओबामा र उनका उच्च प्रशासनिक अधिकारीहरूलाई सन् २०१६ को राष्ट्रपति निर्वाचनमा ट्रम्पको विजयलाई कमजोर पार्न “देशद्रोही षडयन्त्र” गरेको आरोप लगाएकी छिन्। गबार्डले आफ्नो कार्यालयबाट अमेरिकाको न्याय विभागमा सम्बन्धित कागजातहरू बुझाएको र पूर्ण छानबिनको माग गरेकी छिन्।
सार्वजनिक भिडिओमा बिना कुनै सूचना या सचेतनामुक्त उक्त भिडियोमा ओबामालाई दुई एफबिआई एजेन्टहरूले हत्कडि लगाउँदै पक्राउ गरिरहेको देखाइएको छ भने ट्रम्प मुस्कुराउँदै छेउमै बसेको दृश्य पनि समावेश छ। भिडियोको अन्तिम भागमा ओबामा जेलको पोशाकमा जेलको कोठामा बसेको देखिन्छ।
यो भिडियो पहिलोपटक टिकटकमा सार्वजनिक भएको थियो र पछि ट्रम्पले आफ्नै ट्रुथ सोसल खातामा पुनः सेयर गरेका हुन्।
गबार्डले एक्स प्लेटफर्ममा प्रकाशित गरेको शृंखलामा भनेकी छिन्, ओबामाको वरिष्ठ राष्ट्रिय सुरक्षा टोलीले जानाजानी रूसी हस्तक्षेप सम्बन्धी खुफिया विवरणलाई राजनीतिकरण गरेको र ट्रम्पलाई बदनाम गर्ने प्रयास गरेको आरोप लगाइन्। उनले भनिन्, “यो सबै अमेरिकी जनताको चाहनालाई कमजोर पार्ने नियोजित प्रयास थियो।”
गबार्डले , यो षडयन्त्रमा संलग्न जो कोही जति नै शक्तिशाली भए पनि कानूनी रूपमा पूरै छानबिन र कारबाही माग समेत गरेकी छिन् ।
