काठमाडौँ। इतिहासमै पहिलोपटक रोबोटले अन्तर्राष्ट्रिय स्तरमा फुटबलदेखि बक्सिङसम्मको खेल खेलेका छन्। चीनको राजधानी बेजिङमा वर्ल्ड ह्युमोनोइड रोबोट गेम्स आयोजना गरिएको थियो। अगस्ट १४ देखि १७ सम्म आयोजना गरिएको यस प्रतियोगितामा १६ देशका २८० टिमका रोबोटहरुले भाग लिएको बताइएको छ।
प्रतियोगितामा फुटबल, दौड, बक्सिङ, टेबल टेनिस, नृत्य, सफाइ, औषधि छुट्याउने कार्य, मोडलिङ, तथा संगीत प्रस्तुतिजस्ता विभिन्न खेल तथा क्रियाकलाप समावेश गरिएको थियो।
प्रतियोगितामा सबैभन्दा बढी रोमान्चक खेल फुटबल र दौड भएको दर्शकहरुले बताएका छन्। फुटबल खेलमा रोबोटहरूले गोल हान्दा बारम्बार लड्ने, ठोक्किने जस्ता गतिबिधिले दर्शकलाई उत्साहित बनाएको बताइएको छ।
मानव जस्तै आकृति भएका सहभागी रोबोटहरु पूर्ण रूपमा आत्मनिर्भर नभए पनि, आफैं उठ्ने, चल्ने, प्रहार गर्ने जस्ता केही कार्यमा भने उल्लेखनीय प्रगति देखाएको टेक बिज्ञहरुले बताएका छन्।
प्राप्त जानकारी अनुसार, दौडतर्फ चिनियाँ कम्पनी Unitree Robotics द्वारा निर्माण गरिएको H1 रोबोटले १,५०० मिटर दौड ६ मिनेट ३४ सेकेन्डमा पूरा गर्दै प्रतियोगिताको पहिलो स्वर्ण पदक जितेको थियो। त्यस्तै, ह्युमोनोइड रोबोट १०० मिटर स्प्रिन्टमा “Tiangong” नामक रोबोटले २१.५० सेकेन्डमा दौड पुरा गरि विजयी भएको थियो। फुटबलमा भने 5v5 फाइनल खेलमा Tsinghua University को Huoshen Team ले जर्मनीको HTVK+Nao Devils लाई १–० ले पराजित गर्दै उपाधि जित्न सफल भएको थियो। यसैगरी, Hangzhou-based Unitree Robotics ले विभिन्न खेलमा चार स्वर्ण पदक हात पार्दै उत्कृष्ट प्रदर्शन गरेको थियो।
अन्तरास्ट्रिय मिडियाका अनुसार, विजेतालाई स्वर्ण पदकले पुरस्कृत गरिएको थियो । प्रतियोगिताका आयोजकहरूले यसलाई प्रतिस्पर्धा मात्र नभई, एआई र रोबोटिक्स क्षेत्रमा भएको प्रगतिलाई प्रदर्शन गर्ने महत्त्वपूर्ण मंचका रूपमा लिएको बताएका छन्।
