काठमाडौं | युट्युबले इन्स्टाग्राम र टिकटकजस्तै नयाँ ‘कोलाबोरेशन’ फिचरको परीक्षण गर्न सुरु गरेको छ। यस फिचरमार्फत क्रिएटरहरूले आफ्नो भिडियोमा अन्य क्रिएटरहरूलाई सहकार्यकर्ता (collaborator) का रूपमा थप्न सक्नेछन्, जसले गर्दा उनीहरू एक–अर्काका दर्शकहरूसँग पनि जोडिन सक्नेछन्।
यो फिचर हाल सीमित क्रिएटरहरूलाई मात्र परीक्षणका लागि उपलब्ध गराइएको छ। युट्युब हेल्पमा गुगलका एक कर्मचारीले दिएको जानकारीअनुसार भविष्यमा यसको पहुँच विस्तार गर्ने योजना रहेको अनुमान गर्न सकिन्छ।
सोशल मिडिया विज्ञ तथा इन्फ्लुएन्सर मार्केटिङ सल्लाहकार लिन्डसे ग्याम्बलले यस फिचरको झलक देखाउने स्क्रिनसट थ्रेड्समा साझा गरेका छन्। साझा गरिएको स्क्रिनसटअनुसार, सहकार्यकर्ता थप्दा उनीहरूको नाम भिडियो क्रिएटरसँगै देखिनेछ। यदि सहकार्यकर्ताको संख्या धेरै भएमा, विशेष गरी मोबाइलमा, उनीहरूको नाम “…and more” भनेर संक्षेपमा देखिनेछ। त्यसमा थिच्दा सबै सहकार्य गर्ने क्रिएटरहरूको सूची देखिनेछ र प्रत्येकको नामसँगै ‘सब्स्क्राइब’ बटन देखिनेछ।
इन्स्टाग्राम र टिकटकमा जसरी मुख्य सर्जकले अरूलाई आमन्त्रण गरेर मात्र सहकार्य गर्न मिल्छ, त्यस्तै प्रकृति युट्युबमा पनि हुने अनुमान गरिएको छ। यसले प्रयोगकर्तालाई बिना अनुमति अरूलाई भिडियोमा समावेश गर्न नदिने सुनिश्चित गर्दछ।
तर, सहकार्यकर्ताले भिडियोसँग सम्बन्धित डाटा र विवरणहरू (जुन सामान्यतया मूल सर्जक मात्रले हेर्न पाउने हुन्छन् ) अरू सहकार्य गरेका क्रिएटरहरूले हेर्न पाउँछन् कि पाउँदैनन् भन्ने विषयमा भने स्पष्टता आएको छैन। युट्युब र गुगलले सधैंजसो,यो प्रयोगात्मक फिचरबारे पनि प्रयोगकर्ताको प्रतिक्रिया संकलन गरेपछि मात्र यसलाई उपलब्ध गराउने बारे निर्णय लिने बताइएको छ।
